WILLEMSTAD.- Promé detenshon den kaso di dòbel morto na Souax  a kai djis algun ora despues ku e kaso a tuma lugá. Sigur un hopi bon trabou di outoridatnan. Mesora Polis a start ku investigashon relashoná ku e kaso aki.

Esaki a kondusí ku ayera alrededor di 02.45’or di mardugá pues djis algun ora despues di e kaso di asesinato, e Tim di Aresto a logra di  detené un sospechoso den e kaso aki.  Ta trata di e hòmber A.A.O., di 37 aña di edat nasé na Kòrsou. Detenshon a tuma lugá den área di Rio Canario. Relashoná ku e kaso aki, na e sitio di e krímen mes polis a haña i konfiská un tas di un di e víktimanan ku tabatin un revòlver kaliber .38  den dje.

Kontinuando ku e investigashon, ayera alrededor di 05.00’or,  Reshèrshi (RID) konhuntamente ku tim di mantenshon di òrdu públiko a tene un entrada hudisial na kas di e sospechoso den área di Nort Roosendaal. Durante investigashon na e kas, polis a haña i konfiská dos arma di kandela; un revòlver i un pistol.

A presentá e sospechoso A.A.O. dilanti un fiskal ouksiliar ku a ordená su enkarselashon pendiente mas investigashon. Relashoná ku e kaso mes, EXTRA por a komprondé for di bisiñanan na e sitio, djis algun ora promé ku e kaso di bashamentu di bala, tabatin un diskushon fuerte entre algun persona den e área kaminda e asesinato a tuma lugá mes.

E diskushon aki tabata kompañá pa maltrato tambe. Tur esaki aparentemente pa un damita. Partidonan envolví no a keda masha kontentu i a disidí ku mas lat ta regresá pa regla kuenta pero no di e manera korekto. E investigashon den e kaso aki ta kontinuá miéntras ku ainda no por duna identidat di e dos mortonan. E di tres víktima ainda ta den kuido intensivo luchando pa su bida.