WILLEMSTAD.- Bishitá un supermerkado semper ta trese su kosnan kuné. Hopi hende ta bai sin smak, hanshá òf den purá. Pero na momentu ku bo bishitá Vreugdenhil ta imposibel no sinti e ‘good vibes’ ku tin ta reina den e lokalidat. Empleadonan ku un sonrisa, e servisio tòp i e dushi ambiente ta brinda bo alegria na momentu di hasi kompra.

Vreugdenhil, e promé supermerkado di Kòrsou, a kumpli 90 aña di eksistensia. E supermerkado a habri su portanan na aña 1931 na De Ruyterkade sin ‘toonbank’. Señor Frans Vreugdenhil ku hopi orguyo tabata risibí tur su klientela na porta. For di e promé dia Vreugdenhil tabata enfoká riba e amabilidat i trato servisial.  90 aña despues ainda orguyosamente e supermerkado ta konosí pa e sentimentu di felisidat ku klientenan ta sinti na momentu ku nan bin hasi nan kompra.

Di kapitan di barku pa supermerkado

Señor Frans Vreugdenhil tabata kapitan na Koninklijke Nederlandsche Stoomboot Maatschappij i dor di su konosementu ekstenso di e region a ofresé un trabou na West Werf pa un periodo di 3 aña. Durante e temporada aki e a bin stima su isla i a bin konosé e amor di su bida. Esaki tabata motibu sufisiente pa keda Kòrsou i kuminsá su mes negoshi. Su yu señor Karel Vreugdenhil a sigui e pasonan di su tata pa hopi aña i a bira sumamente popular pa su manera servisial i amabel na momentu ku klientenan bishitá e supermerkado. Aktualmente señor Karel Vreugdenhil a baha ku penshun i ku hopi amor i dedikashon su yunan Carlos i Mariela, i subrino Alan Evertsz a tuma e batuta.

Un lokalidat

Despues di un tempu a habri vários filial, entre otro na Marie Pampun i na Colon. Pero tòg a disidí pa enfoká riba un lokalidat, ku ta esun na Dominguito. Antes e tabata un ‘cash&carry’, pero ku tempu e lokalidat a ser transformá den un supermerkado amplio i moderno ku ta konosí entre otro pa su gran surtido di komestibel di kalidat, fruta i berdura fresku i surtido spesial di produktonan orgániko, gluten-free i di diet.

Den transkurso di añanan famia Vreugdenhil a konosé hopi kliente na nòmber i a krea relashonnan amikal i spesial ku vários generashon ku ta frekuentá e supermerkado. Aparte ku Vreugdenhil ta konosí pa su trato servisial, tambe e ta duna bèk na nos komunidat, mayoria biaha sin usa publisidat.

Trato plasentero

Hasi un bishita na Vreugdenhil ta nifiká muchu mas ku hasi kompra na un supermerkado. E trato plasentero, e amabilidat i e alegria ku tin ta reina den e lokalidat, ta pone kada kliente sinti su mes na kas. Famia Vreugdenhil i tambe empleadonan ta kla pa sigui sirbi pueblo di Kòrsou ku e mesun entusiasmo i dedikashon.

Hopi reto

No ta un sekreto ku aktualmente nos ta enfrentando un situashon difísil i ku hopi reto pa motibu di e pandemia. Prinsipalmente 2020 tabata un aña ku nos a sera konosí ku uso di tapaboka, distansia sosial, ‘lockdown’ i ‘plachi di dia’. Nos a drenta un ‘normal nobo’, kaminda mester a kustumbrá ku e medidanan ariba menshoná. Ta un temporada difísil pero nos sa di sigui brinda produktonan di kalidat i e mihó servisio na nos klientenan. Un danki spesial na pueblo di Kòrsou pa respetá e uso di tapaboka i distansia sosial den nos supermerkado i danki tambe di kurason pa e sosten kontinuo.

Vreugdenhil Supermarket, 90 aña brindando felisidat!