WILLEMSTAD.- Kiko ta e diferensia entre PCR i Antigen, tèstnan pa detektá COVID-19. Esaki dr Cesar Ponce, Mikro Biólogo a splika nos. Último simannan por a ripara ku Ulanda ta eksihí pa pasaheronan ku ta biaha pa e pais ei, mester hasi un PCR tèst i un Antigen tèst. A surgi e diskushon dikon dos tèst. Un bo ta haña e resultado práktikamente mesora miéntras e otro un pa dos dia despues.

Dr Ponce a splika ku ta téknikanan di laboratorio, pa por detektá si tin e vírus na e momentu ei òf nò. Si bo tin e vírus, e ta indiká ku e por infektá otro persona. Tin otro pruebanan di laboratorio a detektá anti bòdi, pero eseinan no ta indiká ku na e momentu ei bo tin e vírus.

E kos di mas importante na e momentu di e pandemia aki, ta trata di kòrta e kadena di transmishon pa mas hende no infektá i p'esei ta mihó hasi prueba ku ta detektá si e vírus tei na e momentu ei den e pashènt. I asina por trata di isol’é mesora.

Ta dos téknika prinsipal tin; un ta e PCR. Ta un prueba ku téknikanan molekular mas sofistiká i hopi mas sensibel ku e otro pruebanan. E prueba aki por detektá ku e hende ku tin e vírus i den un entamá mas tempran ku otro prueba manera e anti bòdi.

E vírus yama Sars-Cov 2; nòmber ku e komishon internashonal di sientífiko a dun'é e nòmber, pero na nivel mundial e organisashon di salú a pone COVID-19. Meskos ku kualke otro vírus, e tin un struktura di protekshon i un struktura interno. E vírus tin dos tipo, un tin e material genétiko ku ta e RNA i otro tin e DNA. Den e kaso di e vírus COVID nos ta papia di e RNA.

I p'esei e PCR ta detektá un porshon interno RNA di e vírus, miéntras e pruebanan di Antigen ta detektá e struktura eksterno ku e vírus por tin, por ehèmpel un proteina. E PCR no ta detektá e proteina ei i e prueba di Antigen si. Kada un ta detektá algu diferente.

E ‘guideline’ di Ulanda RIVM ta bisa ku si un persona tin síntoma i ta den rísiko ku e por tin e infekshon i e Antigen sali negativo, mester konfirmá ku e PCR. Ulanda ta eksihí 72 ora e PCR i 24 ora e Antigen.

Esaki debí ku si un hende hasi un PCR 3 dia promé di biaha i e sali negativo, e no ta nifiká ku e persona no tin e vírus, pero kisas e kantidat di e vírus ta hopi abou i p'esei e PCR no ta detektá. Den 3 dia, teniendo na kuenta e tempu di inkubashon ku ta di 2 pa 14 dia, un persona ku a keda infektá, por tin e kantidat di vírus mas haltu i e Antigen si ta detekt’é.

Unda e vírus ta reakshoná promé ora e drenta e kurpa;

Dr Ponce a sigui splika ku na momentu ku e vírus drenta e hende su kurpa, ta kaminda e ta drenta den e kaso aki nanishi i garganta, ta einan e ta reakshoná promé i ta einan por sinti e síntomanan promé.

E síntomanan por ta manera un fèrkout, grip, doló di garganta, doló di kurpa, debilidat.

Sinembargo e problema ta sinta ku hopi hende no tin síntoma. Si tur hende tabatin síntoma ta mas fásil i no mester a hasi e PCR i Antigen ora di biaha mes. Ta 20% di hende infektá ta haña síntoma i e sobra no tin síntoma. Dr Ponce a bisa ku un hende por ta awe hopi bon i no tin niun síntoma pero mayan ta kuminsá ku síntoma.

El a splika ku niun tèst ta 100% positivo pero pa salú públiko ta buska pa detektá mas pronto posibel si e hende ta infektá, i asina evitá ku e vírus ta sigui plama. Si e persona tin síntoma mihó hasi e PCR tòg ounke e persona a hasi e Antigen, e ta rekomendá.

Loke tambe ta importante pa sa ta ku e vírus por keda te un máksimo di 2 luna den hende su kurpa. Pero realidat a mustra ku tiki hende a keda largu asina ku e vírus.  Normalmente hende despues di 14 dia ku e hende tabatin e síntomanan, el a eliminá e vírus.