WILLEMSTAD.- Dos barku di kompania Don Andres a keda para den haf di Kòrsou for di djaluna mainta sin por haña servisio pa deskarga. Asina EXTRA a komprendé djárason atardi último.
Direktor Evi de Jongh ta konfirmá esaki na EXTRA. E ta splika ku no ta promé bia ku barku di Don Andres ta para. Segun De Jongh kasi tur siman su kompania ta keda konfrontá den haf di Kòrsou ku tempu di espera hopi largu. Esaki ta perhudiká ekonomia di nos pais, segun e direktor.
E ta splika ku un di e barkunan ta bin ku produktonan for di Santo Domingo, e otro for di Aruba. Un di e barkunan mester a warda 48 ora promé ku e por wòrdu desembarká, ayera anochi no tabata konosí ki dia e por wòrdu kargá.

Ta trata di kònteiner ku entre otro fruta. Tambe de bes en kuando kònteiner ku produktonan friu. Segun Don Andres e echo ku barkunan ta para 2 òf 3 dia den haf di Kòrsou ta perhudiká ekonomia.
Don Andres pa mas ku 65 aña ta nabegá produktonan pa Kòrsou. De Jongh: “Nos ta nabegá na Santo Domingo, Aruba i Boneiru. Na Boneiru nos ta hasi e trabou di desembarkamentu nos mes. Na Aruba semper nos ta kla den algun ora, meskos na Santo Domingo. E proseso di deskarga i karga nunka ta tuma mas ku 8 ora. Na Kòrsou tin bia nos tin ku warda 48 òf 72 ora.”
E relato di Don Andres no ta úniko, mas kompania ta hopi fadá ku e echo ku barku i kònteiner tin ku para diferente dia den haf promé ku nan por sigui. Esaki ta daña komersio, segun nan.

Manera ta konosí na e momentu aki solamente 1 kran ta funshoná den haf di Kòrsou. Diferente kompania ku EXTRA a konsultá no ta komprendé pa ki motibu CPS no ta invertí den un kran nobo. Tambe ta bisa ku e kompania por tuma mas trahadó den servisio.
Haf di Kòrsou ta den man di kompania CPS, ku tin un monopolio. Kompania di transporte ta splika ku esaki ta nifiká ku no ta permití pa otro kompania por karga òf deskargá barkunan riba nos isla. Kompanianan di transporte ta spera ku gobièrnu ta tuma akshon. “Pero diferente gobièrnunan ta na altura di e problema, pero no ta hasi nada.”
Diferente dékada pasá Kòrsou tabata un ehèmpel pa henter region Karibe. Awor hopi kompania ta reklamá ku nan ta keda konfrontá ku hopi tardansa, pero no ta mira niun solushon pa e situashon.