WILLEMSTAD.-  Kòrsou a konosé su promé elekshon general riba 17 di mart 1949, esta 72 aña pasá. Despues di e elekshon ei Kòrsou a konosé un total di 36 elekshon, pues awe 19 di mart, Kòrsou lo konosé su di 38 elekshon general. Konseho Supremo Elektoral (KSE) ta kere ta oportuno pa duna komunidat un bista di e elekshonnan ku a tuma lugá na Kòrsou for di 1949 te ku 2017.

Konseho Supremo Elektoral ke fiha spesialmente riba e fenómeno di e votonan inválido, pa motibu ku despues di e proseso di sostenementu di lista di 30 i 31 di yanüari tabatin basta diskushon den komunidat,  riba e kantidat haltu di votonan inválido.

KSE a apresiá e diskushon aki, pa motibu ku esaki a demostrá ku e interes den komunidat pa elekshon a oumentá i tambe e konsiensia di balor di kada voto.

KSE ta spera ku e diskushon aki lo kontribuí ku awe un kantidat mas grandi di siudadano lo haña kaminda pa urna, kompará ku e asistensia na e elekshonnan di 2016 i 2017.

Analisando sifranan por bisa ku asistensia na urna for di 1949 te ku 1977 tabata relativamente haltu (riba 80%). Despues di 1977 e asistensia na urna a baha poulatinamente tur elekshon pa alkansá e asistensia di mas abou den nos historia elektoral (57.8%) den 1999. Despues di aña 1999 e asistensia na urna a subi atrobe i a stabilisá entre 60 pa 66% ku un ‘uitschieter’ di 76.1% den 2012.

Den e periodo di 1949 te ku 2017 e porsentahe promedio di asistensia na urna na Kòrsou ta 74.6%.

Seguidamente nos ta tira un bista riba e fenómeno di votonan inválido.

Kiko ta hasi un voto inbálido?

Manera konosí nos sistema elektoral ta funshoná di tal manera ku e votadó na urna ta risibí un biyete riba kua tin un kantidat di lista imprimí ku nòmber di tur e personanan ku a pone nan mes disponibel pa keda elegí pa okupá un asiento den Staten.

E votadó ta ekspresá su eskoho dor di yena ku un pòtlot kòrá e rònchi dilanti di nòmber di e kandidato di su preferensia. E voto ta bira inbálido na momentu ku no por determiná eksaktamente kiko tabata intenshon di e votadó. Por ehèmpel el a yena mas ku un rònchi riba e biyete òf a skibi algu òf a pone su nòmber riba e biyete. Si e votadó no yena ningun rònchi riba e biyete tambe e voto ei ta bira inbálido, esaki ta e asina yamá voto blanku.

E porsentahe di e votonan inbálido durante e periodo en kuestion tabata entre 0.6% (2007) i 4.3% (1990).

Por tuma nota ku den elekshonnan di aña 2002, 2003, 2006, 2007 i e elekshon di yanüari 2010 e porsentahe di votonan inválido tabata esnan di mas abou (entre 0.6% i 1.5%) den nos historia elektoral. Ta bon pa remarká ku den e elekshonnan aki a hasi uso di mashin pa vota. Tur e votonan aki tabata votonan ku kua e votadó a indiká ku e no tin preferensia pa ningun kandidato, esta ku e ta vota blanku.

Konseho Supremo Elektoral ta spera ku pa e elekshon di awe tur votadó hasi bon uso di nan derecho di voto i no hasi su voto inválido, pasobra ta di lamentá ku un persona ta hasi esfuerso pa sali su kas bai urna pa su voto no tin balor.