MpowerMEN ta organisando diferente aktividat e luna aki pa hende hòmber en partikular. Entre otro awe djasabra 13 di novèmber nan tin un tayer pe hóbennan ku ta trata identidat i importansia di e ròl di hende hòmber. E tayer aki ta grátis. Pero kiko ta e meta di MpowerMEN, Gwendeline Lanoy Leuteria a splika ku nan a kuminsá komo un movementu for di 2016. Nan a kuminsá ku e konsientisashon tokante e ròl di hende hòmber. Nan a ripará ku e hende hòmber no ta haña hopi atenshon positivo. Gwendeline ta di orígen trahadó sosial i el a mira den komunidat, trahando ku hóbennan, trahando ku mucha hòmber el a ripará ku nos famia ta konsistí di hopi mama soltero. Pero dikon esaki? Einan por bisa ku e movementu di hende hòmber a start. Gwendeline a hasi diferente envestigashon ku su mes i lesa hopi entre otro “The Boy Problem” i ku ta splika dikon mucha hòmbernan ta kai for di e sistema di skol, i el a topa diferente punto pa habri wowo. Ban pone e ‘vergroot glas’ riba e hende hòmber, i esaki ta konta pa e hóben komo e adulto.

Di Facebook pa un fundashon

Tempu nan a kuminsá na 2016 tabata ku konsientisashon riba Facebook “Father òf Curaçao”. Hopi hende a keda ku tabata un programa pa tatanan so. I nan a kambi’e hasié MpowerMEN i tabata kompartí historia di tatanan. Asina nan a kuminsá i laga tatanan skibi pa nan kiko ta nifiká ta un tata. Kon nan ta eksperensiá di ta tata pa promé bia. Gwendeline ta kòrda Giovanni Abath komo un di e promé hendenan ku a skibi di famia separá, yunan ku otro famia i ku nan a bin huntu i duna splikashon ku nan ta un tim. Famia mesklá pero un tim. E tata i mama di e yu tin di bin huntu i forma un tim, maske nan no ta ku otro mas, pero pa e yu. E tabata ke ta den bida di su yu.

Asina e grupo a sigui krea konsientisashon ku vários historia di tata, hende hòmber i awe por bisa ku nan a evolushoná den un fundashon. Awor nan ta fundashon MpowerMEN Curaçao ofisialmente. E fundashon aktual tin algun siman di eksistensia.

Reakshon

Promé ku a yega na promoshon di e organisashon/fundashon ya nan tabata haña reakshon di hende hòmber komo tata, pa yuda nan ku informashon. E interes t’ei segun e presidente Josipher Walle a splika. El a bisa ku dor di trese e konosementu di kiko nan ta para pe, kiko ta nan meta i kon nan por asistí e hende hòmber durante di su trayektoria, nan lo por haña mas reakshon. Nan ta’tin un wèpsait  Mpowermen.com i tin hopi reakshon di personanan ku ke informashon. Tiki tiki, mas hende sa di e fundashon, mas e hende sa kon e fundashon por duna guia, mas nan lo bin interaktuá mas ku nan.

Mas atenshon

Josipher a splika ku e punto ku e ta kere ku mas mester empoderá e hende hòmber ta pa e tuma inisiativa, tin kurashi pa dal e paso pa nan sali pa nan mes. Konosé bo mes i sa kon bo por ta un mihó persona, un mihó tata i kon pa si bo ke tin famia kon pa sòru pe. E ta kere ku den e área ei mester di hopi guia. E ta kòrda tempu e tabata chikí e no a sinti ku e hòmbernan rondó di dje tabata hasi e parti di eduk’é, lant’e fásil. Komunikashon entre tata i yu no ta loke el a bira ta mas fásil rondó di dje. “Mi yu bin sinta pa nos papia over di sèks, mi yu bin sinta pa nos papia kon ta trata un hende muhé. Esei no ta kombersashonnan normal”, Josipher a enfatisá. El a bisa ku hopi bia e tata ta warda e yu bai puntr’e pa e dun’é un kontesta ariba ariba. E tata ta haña kosnan muchu tabú òf ku e mucha ta muchu chikí pa papia di sierto tópiko kuné. Pero e ta kere ku mester por hiba e kombersashonnan ei. Komo e ta mira den e mucha yònnan ku no ta fásil pa nan pasobra nan ta tuma e mesun aktitut ku nan mayornan tabatin i nan tambe ta hala e mucha for di nan kurpa. Tur esaki ta pone ku e mucha ta bai buska e informashon otro kaminda. I esei ta loke e fundashon ta para pe, un kaminda ku e persona por bin serka dje pa haña e informashon korekto. Sea bo ta mucha òf hende hòmber grandi nos ta purba pone tur informashon aksesibel pa bo desaroyá den e área bo bo ke, asina e presidente a splika Djasabra.

Te hòmber su falta

Te hòmber mes su falta ku e ta bin dilanti negativamente? Gianny Girigoria tesorero di e fundashon ta kere ku esaki ta basá riba un konsepto ku hende a krea ántes pa e hende hòmber. For tempu e por ta kòrda semper ta e hende hòmber a kòrta orea, te a buska muhé afó, te ta kuida kas, e no tin tempu pa su yunan i esei a krea e mal nòmber. Tur hende hòmber a lanta haña esei hopi bia ta mantené nan mes na e kultura ku tabatin rondó di e hende hòmber. Awendia bo ta haña ku hende hòmber a kambia. E hende hòmber tambe a evolushoná. Nan no ke sòru solamente pa pan riba mesa, pero nan ke ta enbolbí emoshonalmente ku e famia. I esei ta pone ku e hende hòmber tambe a kambia kompará ku ántes. Gianny ta kere e hende hòmber den sierto sentido mes a kontribuí na e mal nòmber pasobra nan no tabatin e kurashi di sali padilanti. Pero awor aki nan tin kurashi.

Historia a influensia

Tambe esaki tin di aber ku edukashon, e forma ku e hende hòmber ta lanta. Asina lanta den kas ku mama i en partikular esun soltero, bo no tin e ròl di hende hòmber. I komo hende hòmber kon bo por sa kiko ta nifiká ta un hende hòmber. E hende muhé ku ta lanta e yu hòmber, ta deseá hopi bia pa e tin tal i tal pareha, un pareha ku ta komuniká, ku ta emoshonalmente stabil i tur e kosnan ei pero kiko ta dun’é  yunan? Unda tabata e kaminda ku si e mucha no tin un ròl di hende hòmber unda e por bai pa e mira kiko ta nifiká un hende hòmber. Ta un kombinashon di edukashon, komunidat, historia ku tambe ta hunga un ròl grandi den loke ta bibando aktualmente. Ta hopi faktor a pone stèmpel riba e hende hòmber di awe. Pero awor aki e hende muhé i e hende hòmber ke bin mas dilanti pa trese e puntonan. I p’esei tambe tin hopi hende hòmber ta aserkando e fundashon, esaki mirando e aktividatnan ku ya nan a organisá i kaminda por sinta ku nan ta sinti ku e tempu a yega pa nan Sali padilanti. Nan no ta e loke ta pinta nan eifó mas. Nan no ta proveé finansieramente so, no ta esun ku ta laga e mama so atendé pero e hòmber tambe ke ta envolví.

Ta ami di!

E hòmber mester di su espasio i e muhé mester di espasio pa e krese. E hende hòmber ta konsiente di esei i e tin di duna su pareha i su yunan espasio pa nan desaroyá i konektá ku nan. No ta kuestion di “mi di” pero hiba un kombersashon i puntra. Kisas e yu ta sinti algu ku e tin di papia. Puntra e yu te ora haña sa e motibu dikon e yu ta sinti di e manera ei, dikon e ta reakshoná asina i asina lo komprondé i por krea un esfera mihó ku e yu pa e krese den dje. No por bai mas e estilo di ántes di “ta ami di”.

E hòmber tin derechi pero no sa esei

Ta mashá importante ku e derechi di hende hòmber tambe e organisashon ta representá. Hopi hende hòmber, por ehèmpel tabatin yu i ta pasa den kosnan ku ora nan separá di e mama, tambe no sa nan derechinan. Esei a kontribuí ku e hende hòmber tin mal nòmber. Komo nan no sa nan derechi, si e kos no ta bai entre nan i e mama nan ta bandoná e situashon. E mama tin asina tantu di bisa i asina tantu derechi ku e ta sinti su mes  mas fuerte. Pa e hòmber sigui den e situashon  ei e ta bandoná e yu. Pero ora e bandoná e ta hasié hopi bia ku doló na su kurason. Tin bia e hòmber ta yora anochi i nos no sa. E pueblo ta ferwaktu di dje ku e no ta yora i e ta biba ku su doló, e ta skonde su doló. No ta pasobra e relashon ku e mama no a bai p’esei e no e ke tin relashon  ku su yu. Ta e situashon a push’e afó i el a aseptá di bai tambe. Ki derechi e hende hòmber tin komo tata pa tin akseso na su yu òf akseso pa tin di bisa den bida di su yu. Hende hòmber tin e mal nòmber di bèrdat pero hende muhé tambe a kontribuí na esei. Na momentu ku e situashon a presentá e muhé a skohe pa su emoshon ku e tata en bes di konsiderá e yu. I asina a pusha e tata afó. Tin situashonnan kaminda yunan ta bira grandi i haña sa ku nan mama a stroba nan pa e relashon ku e tata, nan no tin konsiderashon  ku e mama. E mucha hopi bia ta tuma e kulpa riba nan pasobra nan no ta komprondé e situashon. I tampoko ta bisa esei pero e mucha ei ta lanta ku sierto límitenan, e ta lanta ku ‘Daddy issues’ i e ta kana kuné i bai kuné den tur relashon den su bida, te ora e enfrentá ku su tata i e sa e otro banda di medaya, e yu ta haña e libertat pa laga e doló los.

Relashon sano

Fundashon MpowerMen ta kere den un relashon sano entre e hòmber i e muhé. Maske ku e tata no ta huntu ku e mama i e yunan. Tata tambe tin derechi meskos ku e mama tin. Nan ke pa yega na un komunidat kaminda e muchanan por tin un relashon sano ku nan mama i nan tata maske nan dos no ta huntu. Aki na Kòrsou no tin un kaminda di kana komo hende hòmber i ora nan a reuní pa e fundashon aki, esei tabata un di e metanan nan dilanti.  E fundashon a kuminsá organisá den skolnan ku hóben. Despues evento pa hende grandi i ei den nan a trata identidat. E trayektoria pa e fundashon tabata unu largu i ainda no a kaba. Ketu bai nan ta beisig ta konsientisá komunidat riba e tópiko aki. E aña aki nan a start den fakansi grandi ku nan promé grupo di hóben. Nan a partisipá na un ‘summer camp’ pa mucha hòmber. E edat ku e fundashon ke konsentrá ariba ta for di 13 aña pero den nan organisashon di e’summer camp’ nan a haña hopi mayor di muchanan di 12 aña ku tabata ke pa nan yu partisipá.  Ta awor nan ta purba i wak kon ta bai i e focus di nan ta di 13 pa 18 aña pasobra esei ta e edat ku e mucha a bai skol sekundario. Pronto e fundashon lo lansa un klup pa mucha hòmber i un grupo di sosten pa bin huntu. I for di 18 aña bai ariba tin mas aktividat konsiderá e hende hòmber adulto.

Dia 19 di novèmber ta dia di hende hòmber i riba e dia ei e fundashon lo presentá nan mes ofisialmente. Riba e dia ei nan lo bin ku nan plannan i pa djis despues siguiente dia tin e aktividat di ‘Boys meet Men’. Hóbennan ta bai topa adultonan. Den e evento ei e hóbennan lo drenta den diálogo ku esnan di mas edat. Ta un aktividat pa hende hòmber so.

Fondonan

Te ku awor aki hopi kos ku e fundashon ta hasi ta sali for di nan mes saku. Nan tin sierto kompania ku ora Gwendeline traha pa nan, tantu porshento ta bai pa  . Tin lugánan ku a koperá. I p’esei nan a ofisialisá e fundashon pasobra kompanianan ta eksihí esaki pa nan por yuda. E fundashon ta duna guia personal pero tambe guia den grupo. Asina ta bai krea un grupo di sosten pa un yuda otro.

AKTIVIDATNAN

  • Workshop pe hóbennan ku ta trata  identidat i importansia di e ròl di hende hòmber. Djasabra 13 novèmber 2021 di 10 or pa 1 or. Grátis i e ta pa hóben.

 

  • E fundraising event “Boys Meet Men”  dia 20 novèmber 2021 Plaza Ariba, ora 5 or pa 8 or, Karchi ta fl 35 pa hóben i 50fl pa hende grandi

 

  • Grupo di sosten pa adulto ta start djasabra 4 di Desèmber 2021 Hòmber ku eksperensiá…. tuma kontakto ku nos…

 

LAGA UN KOMENTARIO

Please enter your comment!
Please enter your name here