WILLEMSTAD.- Eks hefe di VDC (Servisio di Inteligensia Kòrsou) Edsel Gumbs su informante ta eksistí realmente, ta otro di e preguntanan ku mr. Franken defensor di George “Jorge” Jamaloodin  a lansa ayera den korte di apelashon den kaso Maximus.

Edsel Gumbs dos aña despues di morto di Helmin Wiels dia 5 mei 2013,  a bisa di a aserka fiskal Rip indikando ku un “Informante” ku VDC ta traha kuné tin informashon tokante di morto di Wiels.

E informante no ke a bai RST, debí ku den un kaso anterior, a trat’e malu i pues e ke a papia ku Gumbs.

Segun e informante aki e tabata para na outo huntu ku Jamaloodin, ora esaki a deklará di ke pone un hende friu, pero tambe nòmber di Wiels a kai. Den e outo lo mester tabata sinta Burney “Nini Fonseca i tambe Luigi “Pretu” Florentina (red: e dos últimonan aki ta keda sospecha di a haña sèn serka Jamaloodin pa likidá Wiels”.

Mr. Franken a bai profundo den su defensa riba e “Informante” aki, i te hasta e ta puntra si ta gaña Gumbs a gaña riba e “Informante”.

Segun lei di VDC, e “Informante” mester tin un kódigo. I tambe su personalia mester ta konosí serka VDC, i gobièrnu por sa ken e informante por ta. Sinembargo ora a pidi VDC pa sa ki kódigo e Informante di Gumbs tin, nan no por a saka afó ta ken e hende aki ta. VDC ta konkluí ku e Informante ku Gumbs ta papia di dje no ta traha pa servisio di inteligensia. Mirando esaki, mr. Franken di tin dos kos, sea ku Gumbs no ke bisa kódigo di e informante òf e ta gaña.

Mr. Franken a hasi komparashon di deklarashon di Gumbs na 2015 kontra esun di 2017/2018 ta mira ku tin diskrepansia.

Na 2015 Gumbs ta bisa di a haña informashon serka e Informante despues di atrako riba hoyeria na Renaissance, pero na 2017/2018 e ta bisa ta despues di morto di Wiels el a haña e informashon dje Informante tokante morto di Wiels. Relashoná ku e kaso di atrako, e informante a  menshoná 3 hende na Gumbs, pero na 2017/2018 Gumbs ta bisa ku e  informante a menshoná 4 hende ku tabata envolví den e kaso di atrako.

E defensor a sigui bisa ku Gumbs tabata usa e number di telefòn ku ta kaba ku e numbernan 8301 pa trabou (VDC). E abogado a pidi un rèkert di yamada di telefòn den e dianan di 5 di mei 2013 pa 12 mei 2013 i por mira ku no tin rèkert di yamada di e telefòn aki. Pues pa mr. Franken, Gumbs a gaña ku e informante a yam’é despues di morto di Wiels riba number di trabou.

Ademas Gumbs ta bisa ku dia 1e desèmber 2014 el a keda retirá ofisialmente for di VDC, pero esei no ta kuadra pasobra ta desèmber 2013 esei a sosodé. E momentu ei Gumbs no tabata disponé dje telefòn. Esaki ta trese kuné ku e  informante no por a yama Gumbs riba e number di VDC manera Gumbs a deklará. E abogado ta konkluí ku no por usa deklarashon di Informante di Gumbs komo prueba.