WILLEMSTAD. - E siudadano kurasoleño Shurendly Stephen Granviel a haña su mes den problema ku polis den siman ku ta kabando aki, pa motibu di un interkambio di palabra ku polis ku no a gusta e forma kon e komunikashon a bai.

Shurendly Granviel ta lamentá e suseso ku a haña publisidat pa algu insignifikante.

Shurendly a splika ku e tabata pará ta wak barku ta sali haf i tabata kombersando ku un persona. Un dado momentu e ta tuma nota ku polis a aserká e persona ku e tabata kombersá kuné i a kuminsá listra e persona. Shurendly e momentu ei a puntra e persona ku si tur kos ta bon i aki un di e polisnan a kontestá Shurendly den un forma, na su opinion, malu.

Esaki tabata motibu ku Shurendly a reakshoná bèk den direkshon di e polis i aki a surgi un interkambio di palabra entre di Shurendly i e polis(nan).

Shurendly a atmití ku el a reakshoná un poko agresivo, pa motibu ku e no por a komprondé dikon e polisnan mester a papia dje malu ei kuné, pa e simpel echo ku el a puntra e persona ku tabata keda listrá, si tur kos ta bon.

E polisnan ta kue benta abou i bui su man i arest’é. Akia haña un kabitu di mariwana den su poder. Pues e aresto tabata basá riba e forma di papia ku polis.

E loke ku Shurendley no a ferwagt ta ku su aresto a kapta atenshon di media aki na Kòrsou.

‘Ora bo ta hasi kos positivo niun hende no sa, pero un konfrontashon insignifikante ku polis ta haña atenshon di media’, tabata palabranan di Shurendley ku tin solamente dos luna na Kòrsou, sondeando   merkado di Kòrsou, pa e loke ku e ta hasi.

Shurendley, ku ta biba na Tenerife i ku den su bida diario ta den e mundu di entrenamentu, ta forma parti di un agrupashon musikal, kaminda ku e ta un di e kantantenan di e agrupashon i ta entretené aktividatnan privá di taya.

Pa duna un ilustrashon di algun di su aktividatnan Shurendly a splika ku el a kanta pa embahador di India i tambe pa e aktor merikano renombrá Matthew Paige Damon, konosí komo Matt Damon, ku tabata na Tenerife grabando un pelíkula.

E organisadó a solisitá Shurendly Stephen Granviel ku su nòmber artístiko ta Andy Stephen spesial pa motibu ku nan tabatin mester di un persona ku por kanta i entretené riba un nivel haltu den ingles.

Andy ta lamentá e suseso i tabata ke a trese dilanti ku den su bida diario e ta un hende positivo i no problemátiko.

Despues di a traha un prosèsverbal, polis a pone Andy den libertat.