DEN HAAG.- Ekspertonan den un konseho na Parlamento ulandes ta indiká ku ta mihó rechasá e proposishon di lei ku ta trata e Areglo di Disputa (geschillenregeling) ku e sekretario di estado ulandes Raymond Knops a presentá resientemente. Segun e ekspertonan, e loke e sekretario di estado a presentá tin asina tantu defisiensia ku ta mihó e mandatario kuminsá kompletamente di nobo.

For di Den Haag ta yega e informashon ku awe a tuma lugá un reunion den kua ekspertonan ku Tweede Kamer a konsulta a duna nan punto di bista riba e areglo di disputa. Ta bon konosí ku Kòrsou, Aruba i St.Maarten tin opheshon grandi kontra di e areglo aki debí ku ta konsiderá ku Knops a presentá ku algu ku no ta tene niun tiki kuenta ku posishon di e paisnan ulandes den Karibe.

Resientemente un grupo di parlamentario di Kòrsou i e otro paisnan a topa ku nan koleganan na Den Haag unda a diskutí e situashon i alabes a trata na konvensé miembronan di Tweede Kamer pa no bai di akuerdo ku loke Knops ta bai presentá na yüni próksimo.

Minister plenipotensiario di Kòrsou Anthony Begina a asistí na e enkuentro ku a tuma lugá awe ku e ekspertonan. Pa hopi dékada tabatin diskushon den Reino kaminda e partnernan mas chikí ta reklamá ku semper Ulanda ta imponé su deseo i ni maske kuantu e islanan protesta semper Ulanda ta haña e forma pa imponé su ponensia. Den Konseho di Minister di Reino e mayoria representantenan ta defendé e interesnan di Ulanda i asina semper e islanan ta kai chikí. Na 2010 momentu ku Kòrsou i St.Maarten a haña nan status outónomo, huntu ku Aruba a kuminsá e diskushon atrobe pa yega na un areglo di disputa. Mas detaye den EXTRA.