WILLEMSTAD.- Riba hinter mundu nos ta purba di duna konsenshi na hendenan ku nos tin ku stòp di e konsumo di plèstik ku nos ta usa un biaha so. E ta kousá un seru inmenso di polushon, no solamente riba tera, pero mas malu den oséanonan, ku no ta manehabel mas. Riba nos isla mes tin hopi kantidat di plèstik na Noorkant, p.e. na St. Joris, Playa Kanoa, Boca Ascencion i Shete Boca.

Den oséano e plèstik ta kibra den pidanan minúskulo, ku ta wòrdu komé dor di piská i otro bestianan di laman i e ta mata nan, òf mas malu, nos ta kushiná e piská i nos mes ta komé huntu ku e plèstik. Imaginá bo!!

Saku di plèstik ta wòrdu komé dor di dòlfein i bayena, pasó nan ta kere ku e ta bestianan di laman chikí. Nan stoma ta yena ku plèstik, ta p’esei nan no ta kome kuminda berdadero mas, i nan ta muri dor di mal nutrishon.

Djasabra awor, dia 8 di yüli PLASTIC FREE CURAÇAO ta presente na marshe BETH na Awasá (Brionplein). Nan kier eduká hende kua plèstik preferiblemente no usa mas pa tene e ambiente, e tera di nos tur (ser humano i mundu di bestia) bunita i limpi.

Nos tin un mundu so. Kremenchá di dje.

Pa mas informashon haña nos riba facebook: “PLASTIC FREE CURAÇAO’