DEN HAAG.- E motibu di e ‘crash’ fatal dje helikòpter militar den laman na Aruba ta konosí. E insidente aki tuma lugá dia 19 di yüli di e aña aki durante di un seshon di treinen. Dos militar, di e kuater tripulantenan ulandes abordo dje helikòpter, a fayesé. E pilot dje helikòpter i e kordinadó táktiko a fayesé.

Sinembargo e forma kon e echo a sosodé tòg ta lanta pregunta serka e konseho di investigashon di seguridat di defensa. Esaki ta bin dilanti den un rapòrt di investigashon ku a keda publiká siman pasa.

E insidente a tuma lugá durante di ehersisio pa baha e helikòpter riba e barku militar  Zr.Ms. Groningen, ku ta stashoná den awanan di Karibe.

For di investigashon a sali na kla ku e helikòpter a kai den awa dor ku e aparato a kue un bògt riba un velosidat igual ku e fluho di bientu e momentu ei, ku tambe tabata haltu. Dor di esaki e aparato lo a keda ”kologá” i para ketu den laira.

Dor di e sirkunstansia aki mester duna èkstra “velosidat pa keda mantené e helikòpter den laira. E pilot a hasi e ehersisio aki, pero dor dje haltura abou ku e helikòpter tabata bula, tabata poko difísil pa por a koregí e kaida na tempu. Di forma rápido, e helikòpter a pèrdè haltura, i dentro di algun sekònde el a resultá den laman.

Dor di esaki, e dos tripulantenan ku tabata sinta parti patras por a sali lihé for di e aparato, pero e piloto i e koordinadó táktiko no por a los nan mes na tempu pa di tal manera nan por a sali afó ku konsekuensia ku nan a hoga.

For di investigashon mas aleu a mustra ku tripulantenan di Zr.Ms. Groningen a hasi bastante esfuerso pa reskatá nan koleganan.  Pero dor di olanan haltu i kapasidat limitá i henter e konmoshon ku tabatin abordo di e barku, no por a hasi e reskate satisfaktoriamente.

Den ougùstùs ya kaba e konseho di investigashon i Inspekshon di seguridat di defensa a indiká den un relato preliminar ku e aksidente fatal no tabata dor di un “storing” tékniko of mekániko.

Inspekshon di Seguridat i Defensa ta hasi investigashon mas aleu riba e preguntanan ku a surgi a base di investigashon hasi. “E preguntanan aki tin di aber ku e estudio i treinen di e tripulashon, e eskoho pa bula ku un piloto”.