WILLEMSTAD.-Penshonadonan di Fondo di penshun APC ta pendiente di nan penshun i pa esnan ku tin nan kuenta na Girobank, e desaroyonan di ayera ta motibu di preokupashon serio. E penshonadonan no ta preokupá pa APC pasobra e fondo di penshun semper a kumpli nechi ku su klientenan, sinembargo esun ku tin ku kobra via Girobank si ta kuminsá bira nervioso. APC ta bisa tur su penshonadonan pa keda trankil, asina Maria-Helena Seferina di APC a duna di konosé na EXTRA.

E penshonado di APC ta pendiente pago di penshun den dianan benidero i informashon ku EXTRA ta disponé di dje ta indiká ku ya kaba e pagonan di penshun di APC ta den proseso. Pues na APC sigur tur kos a kana na òrdu pa kumpli ku nan penshonadonan. E insertidumbre ta relashoná ku e desaroyonan rondó di Girobank. EXTRA a papia ku penshonadonan di APC ku ta kobra via Girobank i nan ta mustra ku nan no tin otro banko i na di dos lugá tin obligashonnan rutinario ku mester kumpli kuné, pues e opshon pa bai buska otro banko algun dia prome ku kobra no ta yuda na solushon.

Sra. Maria a splika EXTRA ku na e momentunan APC no por duna niun informashon tokante di e situashon di Girobank. Nan ta rekomendá tur hende pa sigui e konferensha di prensa di Banko Sentral ku tin tur outoridat riba Girobank.

E representante di APC a hasi un apelashon na tur penshonado di APC pa keda trankil. Den kaso ku tin deseo di un penshonado pa pasa pa otro banko e por akudí na departamentu di penshun di APC i hasi petishon pa hasi e kambio pa otro banko.