WILLEMSTAD.- Minister di Desaroyo Sosial, Labor i Bienestar Hensley Koeiman djabièrnè último a duna informashon tokante sosten laboral durante un konferensia di prensa di gobièrnu. Koeiman a bisa ku e portal pa sosten finansiero òf karchi sosial pa kompra di komestibel a habri bèk 7 di desèmber último. Djaluna 21 di desèmber 9 or di anochi e portal ta sera bèk. Pa yena petishon hende por bishitá www.fondodisosten.org. Tambe Koeiman a duna di konosé ku hende ku a bini na remarke kaba pa sosten laboral a risibí un WhatsApp òf e-mail ku e petishon pa indiká nan status laboral. “Esnan ku no tin trabou ainda, ta sigui risibí sosten te ku fin di desèmber 2020, miéntras ku nan ta desempleá. Pues nan no mester a inskribí di nobo”, Koeiman a bisa.

Hende ku ke apliká pa sosten laboral, esta sèn òf un karchi sosial, tin ku duna sierto informashon i tambe kopia di sierto dokumentonan. Tur hende ku a pèrdè trabou despues di 15 di mart 2020 tin ku duna un bon portrèt di nan sédula bálido ora nan ta apliká via e portal. Tambe nan tin ku duna un kuenta di banko aktivo riba nan number, adrès di nan banko, number di CRIB personal, number i adrès di e kompania kaminda nan a traha, dos último slepnan di salario, karta di retiro, diploma, sertifikado òf Curriculum Vitae.