Inter-Assure CEO Justus van der Lubbe:

WILLEMSTAD.- Awe dia 14 di sèptèmber 2023 Inter-Assure Insurances ta eksistí 30 aña. CEO-doño Justus van der Lubbe ta konvensí ku su kompania ta distinguí su mes na promé lugá danki na su personal. Pa e kompania di seguro, kalidat ta nifiká hopi mas ku un bon konosementu di e materia. Mes òf mas importante ta un bon atmósfera na ofisina. ‘Tur empleado sa kiko nan mester hasi i kon nan mester hasié, i nan sa ku nan ta altamente apresiá.’

Pa loke ta kliente tambe semper Inter-Assure a pone kalidat dilanti. Un vishon importante tabata semper pa no fiha riba volúmen pero riba ‘mihó kliente’, entre otro famianan hóben ku tin trabou i ku a edifiká algu huntu. Hopi biaha esei ta relashonnan sólido ku ke seguridat pa nan kas, outo òf otro pertenensia i ku ta motivá pa paga un prima pa esei. E kresementu konstante di e último tres dékadanan aki ta mustra ku e fórmula di kalidat aki a duna fruta.

Inter-Assure a kuminsá na 1993 na Kòrsou for di un kamber di kas di CEO Justus van der Lubbe, despues ku el a gana eksperensia na St. Maarten trahando pa e ofisina di seguro di su tata, J.P. van der Lubbe.

Na 1991 papa Van der Lubbe a bende su ofisinanan na Amsterdam, Kòrsou, Aruba i St. Maarten. Mei aña despues ku Justus a kuminsá riba su mes for di kas, el a usa e sèn di benta di su akshonnan den e ofisina na St. Maarten pa kumpra un kas modesto den Mercuriusstraat na Kòrsou i hasié un ofisina.

No opstante tur reto e promé añanan, Inter-Assure a logra haña tur agensia di tur kompania di seguro lokal i algun na Hulanda.

‘Na 2011 m’a bai Banko Sentral ku e petishon pa por operá komo kompania di seguro tambe aparte di makelar outorisá di seguro. A base di un trayektorio di kasi 25 aña mi por a mustra ku nos a krea un kartera solvente. For di 2012 nos ta operá komo makelar di seguro í kompania di seguro den e ofisina na Saliña ku nos a desaroyá huntu ku e arkitekto Kurasoleño prof. ir. Carlos Weeber. Pa fin di 2022 nos tabatin un solvensia di 304%.

Sr. Van der Lubbe ta konstatá ku e gobièrnu akí ta habrí pa inisiativa nobo. Esei ta un kambio positivo, maske gobièrnu mester ta mas realista tambe den e sektornan kaminda no tin sufisiente hende pa hasi e trabou. Pero loke no a kambia nada i entre tantu hasta ta parse ireversibel, ta deskuido di e desaroyo di abitantenan di Kòrsou. Por ehèmpel, un komunidat krítiko lo no a permití nunka pa kuido di grandinan deshumanisá pa gran parti di e forma akí. I hende lo a nota masha tempu ku kuido di salú apénas tin di aber ku kuido, i ku komunidat mes lo mester paga debenan pa un edifisio di hòspital muchu karu.

Meskos ku siudadanonan lo haña nan ta paga refinansiamentu di ENNIA. Pero ta parse aki ku hende no ke siudadano bon informá. P’esei ta laga enseñansa sigui chambuká i produsí hóbennan ku hopi biaha no ta dominá idiomanan ku nan mester pa nan por informá nan mes ampliamente.

Segun sr. Van der Lubbe e pregunta grandi pa futuro ta si nos ta dispuesto pa bandoná aktitutnan ku ta kousa problemanan eksorbitante. Por ehèmpel, laga kos bai numa i laga e generashon mas hóben karga e konsekuensia. I tambe e papel di víktima ku sa kai aden pa hui responsabilidat propio kaminda ta kumbiní. ‘E tendensia di hustifiká kos bisando ku ta dor di loke a pasa den pasado, parse un chòis konsiente. Pasobra e ora ei niun hende no ta ripará ku gobièrnu ta tene nos chikitu i niun hende no ta sinti su mes yamá pa pone man na obra. Sin duda mester registrá pasado di un forma kla i kompletu, i hasi esei aksesibel pa tur hende. Pero ta dañino pa skonde tras di esei en bes di krea e kondishonnan huntu pa sali for di nos problemanan. Kòrsou i su poblashon bal muchu mas ku esei.