WILLEMSTAD.-Bakunanan kontra Covid-19 a yega Kòrsou. Minister Zita Jesus-Leito huntu ku otro funshonarionan di Salubridat tabata na aeropuerto Hato pa risibí e avion di KLM ku a yega ku e promé lote di bakunanan. Manera ta konosí Kòrsou i otro paisnan den reino Ulandes ta risibí e bakuna for di e lote ku Ulanda a kumpra.

Ya ta basta dia kaba ku gobièrnu a kumpli ku tur e kondishonnan nesesario pa warda e bakuna. Por ehèmpel for di momentu ku e bakuna Sali Ulanda te ora e yega Kòrsou e mester ta den e temperatura korekto. Pfizer mester keda na -80grado i mester keda kontrolá e temperatura. Den e promé trayekto no ta bai tin sufisiente bakuna pa tur hende. E promé lote ta bai pa e grupo vulnerabel ku ta personanan riba 60 aña i esnan ku ta traha den sektor di kuido.

Niun kaminda no por obligá un hende pa tuma e bakuna, sinembargo ta duna informashon pa asina kada hende por disidí si e ta tuma e bakuna si òf no. E tim a informa ku e bakuna di Pfizer ta bin promé, despues esun di Moderna i último esun di Astrazenica.

Ora kaba di bakuna un hende mester tene den opservashon pa un ratu pa kontrolá si su kurpa ta reakshoná bon ku e bakuna.