COVID por presentá pero ta Dios ta disidí

... “Dia 20 di mart mardugá COVID-19 a bati na mi porta ofisialmente sin ku mi mes tabata na altura.

Kuminsá sinti mi kurpa malu mardugá i mainta mi a mèldu malu na mi trabou.”

Esaki tabata palabranan di Gileon “Gilo” Garmers un hòmber di 56 aña di edat bon di sali, gusta move i hasi ehersisio.

Gilo tabata e persona ku e kontagio di e vírus COVID-19 i bira e promé kaso di kontagio lokal ku Kòrsou a konosé.

El a konta EXTRA su historia kon tur kos a kuminsá, kon el a keda 6 siman den koma i te asta haña santa holia debí ku ya no tabatin ningun speransa mas pe.

Pero pa obra di Dios awe 9 luna despues, Gilo tei ketu bai riba pia i rekuperando tur dia mas.

Kurpa a kuminsá bira malu

Dia 20 di mart riba un djabièrnè durante oranan di mardugá drumí riba mi kama kurpa a kuminsá bira malu.

Mi a kuminsá sinti entre otro rosea bira kòrtiku i doló di kurpa.

Mi tabata sa ku tin algu robes pasó mi no ta hende ku sa bira malu mes.

E momentu ei mi a pensa tur kos inkluyendo ku Kisas ta COVID mi tin.

E dia ei COVID tabata resien na Kòrsou i no tabatin masha tinu di dje ni tampoko e síntoma nan, Gilo ta konta EXTRA.

Siguiente dia trempan mi a bai dòkter.

Dòkter a hasi mi algun pregunta inkluyendo e síntomanan di COVID kual esnan prinsipal ku ta tosamentu i keintura haltu mi no tabatin.

Dòkter a indiká na mi ku kisas ta dengue mi tin i ku lo bai hasi algun tèst pa konfirmá esei.

Mi a hasi e tèstnan I esakinan a bini bèk negativo, pues mi no tabatin dengue, segun Gilo ta konta.

Kurpa a sigui mesun malu i riba mi mes mi a regla i logra pa mi por bai hasi e tèst di COVID.

Despues di 1 siman malu mi a hasi tèst di COVID

Despues di un siman malu, riba un djabièrnè mi a logra ku GGD a bin hasi e tèst na mi kas.

Esaki a bini positivo.

Aki tur kos a kuminsá na momentu ku ma haña mi enfrentá ku e realidat.

Kurpa a sigui bira malu. Su siguiente dia, un djasabra mi dòkter a bin wak mi na kas.

El a bisa mi ku no por sigui tene mi na kas paso mi kurpa ta hopi malu i ku e lo manda mi hospital mesora.

Ambulans a bin buska mi na kas i mi a sali rumbo pa hospital kual a bira mi kas pa 2 luna i 3 siman di kual 2 luna kompletu mi a pas’é den departamento di kuido intensivo.

Na hòspital mi a sa ku mi pulmon a yena ku vògt.

E mesun dia ei mi a bai den koma i mi a keda asina pa 6 siman.

Durante e 6 siman nan ei dòkternan no tabatin speransa mas p’ami.

Dado momento mi a haña santa holia debí ku tabata spera mi morto un ora pa otro.

Despues di 1-2 siman den hospital mi tabata liber di COVID

Despues di 1-2 siman den hòspital ya mi tabata liber di COVID.

COVID a sali for di mi sistema lagando ami ta lucha ku mi bida ku tur e dañonan ku el a hasi na mi salu.

Unabes ku a komprobá ku e vírùs a sali for di mi sistema, a kuminsá atendé ku mi di otro forma mirando ku a kuminsá tuma tur prekoushon for di trempan.

Pa milager di Dios e santa holia tabata un forsa pa mi rekuperashon.

Despues di 2 luna i tres siman mi tabata kla pa yama hospital ayó.

...Despues di 2 luna i 3 siman, mi a yama CMC danki pa tur kos...

Ainda no ta kla

Ainda mi ta rekuperando, Gilo a indiká na EXTRA.

Mi no a kuminsá traha bèk ainda si. Mi pulmon kual ta esun ku mas a keda afektá tambe ta bayendo dilanti tiki tiki. Aktualmente mi pulmon ta funshonando 75%.

Mi a tuma COVID na serio promé ku mi mes a keda afektá?

Gilo a konta EXTRA ku na e banko lokal kaminda e mes ta laborá a tuma sierto prekoushon e dia ei, (no hopi manera ta aktualmente).

Inkluso Gilo mes tabata limpia su mesa konstantemente.

Pafó di trabou tambe e tabata kuida ounke asina tòg el a keda infektá.

Mi famia a sufri hopi

E temporada ku mi tabata malu, mi famia a sufri hopi. Mi dos yunan i mi demas famia a mira kon mi kurpa tabata bayendo atras dia pa dia sin ku nan por hasi nada p’ami.

E temporada ei ta un hende so por a bai wak mi na hòspital. Pues niun hende no por a yega serka di mi.

Mensahe na komunidat

Loke mi por bisa esnan ku aktualmente ta infektá ku e vírùs, nunka pèrdè speransa. Kuida kurpa, kuida esnan rondó di bo i evitá mas kontagio.

COVID no ta tene kuenta ni ku hende ku ta bon di salu.

Esnan ku ta kere ku COVID no ta eksistí i ku ta wega e kos aki ta ,wak rondó di bo, wak notisianan i puntra bo mes si realmente tur esnan ku ta pasa malu, ta wega nan ta hasi.