WILLEMSTAD.- “E pueblo tin hamber, e pueblo ke trabou. Si otronan a duna e pueblo kuminda den periodo di COVID, dikon KEM lo no por hasi meskos?” N’e momentunan aki KEM no tin tempu pa yag tras di muskita, sino ku ta trahando for di awor pa e pueblo. Asina e konsehero i dirigente di partido KEM, sr. Anthony Godett, a duna di konosé komo reakshon riba e presunto denunsia ku sr. Elvis de Andrade lo ke hasi kontra KEM pa motibu ku e lider polítiko sr. Michelangelo Martines lo ta kumpra voto dor di parti bòn di komestibel.

Segun sr. Godett, defakto nan no ke pèrdè masha tempu ku Andrade, pasobra si bai na divulgá su aktonan ilegal no ta sobra nada di dje. KEM no tin intenshon di bai yag tras di muskita, pasobra tur hende sa riba kiko muskita gusta para. E bai tene lanta otro kaminda.

KEM ta meimei di un kampaña sin tira ku lodo i ku e meta pa yuda e pueblo konkretamente, ta p’esei ta dunando e medionan pa kumpra kuminda. Esnan ku sa kana bario por bisa: E pueblo tin hamber! Den polítika no ta kumbiní pa bo kumpra enemigu pa bo kurpa. “Ami no sa kiko e ke logra, aunke ta parse ku e tin un frustrashon grandi”, asina Godett a remarká referiendo na De Andrade. Pero dia 31 di yanüari nos lo wak si e ta haña e sosten pa bai elekshon.

Polítika ta nifiká ku komo partido bo ta bisa kiko bo ta bai hasi, pero kosnan realístiko. No manera tin hende ta kana propagá ku nan ta bai oumentá ònderstant na 1.100 florin. Si ta asina, anto hopi hende lo keda sin bai traha i biba riba kustia di gobièrnu numa. Es mas, kiko lo hasi e ora ei pe penshonadonan ku tin di wak kon ta sobrebibí tur luna ku e 800 florin di AOV?

En e okashon aki KEM ta sigui hiba un kampaña limpi i no personal i sin tira ku lodo. Si bo ta mira ku KEM den kampaña ta yuda hende pa nan kumpra komestibel, anto hasié bo tambe, e hendenan lo ta kontentu. Ata ‘Voedselbank’, Krus Kòrá i otro organisashonnan den komunidat a repartí kuminda den periodo di COVID, dikon KEM no mag?

El a enfatisá bisando ku, tin dos kos ku e pueblo ta pidi tur dia: trabou i kuminda!  KEM ta bayendo duru aworakí i kosnan ei tin nan nèrvioso, pasobra e trein di KEM kondusí pa Michelangelo Martines tin un direkshon i ta den Fort Amsterdam e ta bai para!