WILLEMSTAD.-Kòrsou tin 47 kaso positivo di Covid na tur. Manera EXTRA a informá awe mainta tin 4 kaso nobo ku a keda registrá, di manera ku awor tin 12 kaso aktivo. Dr. Izzy Gerstenbluth a informá ku e 4 kasonan nobo tur ta di lenk na un di e gruponan anterior. Pues e kasonan nobo no ta separá, pero nan tin un lenk na klusternan eksistente. Sinembargo esei no ta motibu pa niun hende bira kontentu.

Segun Gerstenbluth, si a kuminsá haña kasonan ta nifiká ku basta lihé lo por topa ku mas kaso i nan tambe por infektá otro. E reto ta si por tene e kasonan mas limitá posibel.

Gerstenbluth a sigui splika ku den e di dos kluster tabatin un mucha ku a test positivo na Vigdis Jonckheer college i esei a pone ku mundu di enseñansa na Kòrsou ta nervioso, loke ta komprendibel. A palabra ku sektor di enseñansa ku e direktorado di informashon lo pone un lenk riba kua mayornan i otronan ku tin pregunta por pone tur pregunta relashoná ku e kasonan. Di e forma aki ta spera do por atendé e inkietutnan serka mayornan i dosentenan. A plania un webinar mayan djarason 26 di ougùstùs pa 5’or di atardi den kua lo partisipá tur direktiva di skol i kabesnan di skol. Tur hende ta hasi yen pregunta kiko i kon nan mester aktua den kaso ku na otro skol tambe presentá un situashon similar.

Gerstenbluth ta insistí ku tur hende mester keda trankil. Hendenan ta preokupá pasobra tin 30 mucha den un klas, pero e realidat ta manera e ta. Sinembargo WHO ta mustra ku e transmishon di mucha pa hende grandi ta hopi chikitu. P’esei e riesgo ta basta limitá ora ta papia di mucha kontagiá hende grandi. E chèns no ta sero pero keda kalmu. Tin tur motibu pa no bira loko i no krea pániko. Purba mas tantu pa kontené e situashon. Lamentabel ta ku medionan sosial ta saka tur kos i no nesesariamente ta verídiko. Mas detaye den edishon di EXTRA.