WILLEMSTAD.- Pa djaweps awor gabinete Pisas lo ke anunsiá fleksibilisashon mas aleu di medidanan den kuadro di Covid-19. Esaki lo ta sigui riba desaroyonan di fleksibilisashon na Aruba i Hulanda tambe.

Un di e puntonan di fleksibilisashon ta e obligashon pa bisti tapa boka ku lo no ta vigente mas. Kontròl na airopuerto si ta kontinuá. Motibu pa fleksibilisashon ta e kantidat di kasonan lokal di infekshon ku ta sigui abou. Mayoria kaso di infekshon ku ta konstatá na Kòrsou ta kasonan importá. Pa e motibu aki pues ta sigui ku e kontròlnan na airopuerto.

Antisipando riba e fleksibilisashon di e medidanan por a tuma nota kaba ku na diferente supermerkado no ta limpia mannan di garoshi mas i tambe tin supermerkado ku ya kaba ta laga klientenan drenta sin un tapa boka bistí. E fleksibilisashon ta bini na momento ku rònt mundu ta mira tòg preokupashon ku e variante Delta di e viro di Corona. Tin paisnan bayendo asta bèk den “lockdown”.

Un grupo chikí di persona ku no a bakuná por kousa ku e pais mester tuma medida stringente atrobe manera ta pasando na Israel. Durante último “lockdown” na Kòrsou ta 7.500 persona ku ta apénas 5 porshento di e poblashon a detektá ku infekshon ku e vírùs.

E timnan di kontròl entrante e siman aki ta bai subi kaya atrobe, pasobra entretantu a detektá ku e situashon ta saliendo for di man. A suavisá i tur hende ta laga kumplimentu ku regla tambe bai. Ta organisá aktividatnan sin ku tin pèrmit pa esaki, ta atmití muchu hende den negoshinan i tambe tin tokamentu di muzik muchu duru.