WILLEMSTAD.- Den e siman aki partido PAR lo organisá un reunion di partido (“partijraad”) pa asina duna informashon riba e último desaroyonan rondó di nombramentu di kandidatonan pa drenta parlamento. Manera EXTRA ya a informá liderato di partido a pidi Zita Jesus-Leito pa no drenta parlamento i asina duna oportunidat na polítikonan mas hóben bira parlamentario, haña eksperensia i sigui representá e partido den futuro.

Tin hopi antisipashon den partido PAR pa e reunion. Tin un koriente den e partido ku ta pro e posishon di Jesus-Leito, esta ku konforme nos leinan e tin derecho pa aseptá e posishon di parlamentario a base di su puesto riba lista di kandidato.

Di otro banda tin un otro koriente ku ta di opinion ku e kantidat di 185 voto ku Jesus-Leito a risibí durante elekshon na mart ta prueba ku e votadó a rechasá su maneho i mirando su trayektoria largu kaba den polítika ta bon pa e hala atras i duna otronan un chèns.

Lider polítiko, Eugene Rhuggenaath mes ta bisa di tin hopi apresio pa tur loke Jesus-Leito a nifiká pa PAR. Ta bou di liderato di Jesus-Leito a aserká Rhuggenaath atrobe pa drenta partido na 2015 te ku el a bira Jesus-Leito su susesor i na 2017 PAR ku Rhuggenaath komo lider a sali e partido mas grandi despues di elekshon ku 6 asiento.

Di otro banda Rhuggenaath tambe ta mustra riba e resultado di último elekshon ku ta un señal fuerte di e votadó.

Rhuggenaath su pensamentu ta pa mantené Jesus-Leito komo konsehero di frakshon huntu ku Stephen Walroud pa e próksimo temporada di gobernashon. Na lugá di Jesus-Leito, Steven Croes lo drenta parlamento. Si e senario aki bira realidat e lo nifiká alabes final di periodo di Rudy Leonora komo konsehero di frakshon.

Na opinion di Rhuggenaath, hóbennan den polítika manera Steven Croes i Quincy Girigorie meresé e oportunidat pa okupá funshonnan polítiko pa partido PAR pasobra ta nan ta e futuro. For di momento ku a traha lista di kandidato pa elekshon di 19 mart, a proponé pa pone Jesus-Leito karga lista komo un promé paso pa duna karanan nobo un chèns pa bini mas haltu riba lista, pero tabata Rhuggenaath mes ku a disidí pa pone Jesus-Leito tòg number 4 riba lista.

No por deskartá e posibilidat ku e diskushon aki den partido lo lidia al final na un kiebro entre Jesus-Leito i PAR i ku e parlamentario lo asumí un posishon independiente den parlamento.

Jesus-Leito su opinion ta ku su eksperensia den polítika ta hustamente lokual ku PAR mester na e momentonan aki pa por hiba un oposishon fuerte den parlamento.