Miraila Bernadina-Theodora tin hopi aña di eksperensia ku guia di studiantenan na Hulanda. Miraila tabata na Kòrsou kaminda el a hasi su mes konosí ku e organisashon Virtual Youth Support ku ta pa guia studiantenan di Antia i Aruba di tal forma, ku nan ta motivá optimalmente pa for di nan propio responsabilidat reanudá i terminá nan estudio. Miraila mes tambe ta traha na Universidat na Ulanda i mirando kon haltu e grado di hóbennan ku bai studia Ulanda ta kai for di e sistema, el a disidí di bin Kòrsou tambe pa pone su ekspertisio disponibel pa yuda hóbennan ku mester di esaki.

Inisiativa di kurason....

Miraila a konta Djasabra di e sosten virtual na hóbennan. Esaki ta un inisiativa ku a sali for di su kurason pa nos antianonan na Ulanda. Ultimamente por mira ku e muchanan no ta hal e estudio i ta dura tantu aña kreando un debe haltu pa despues i esei no ta e intenshon. I p’esei el a pensa un manera ku e por yuda nan pa nan por kaba nan estudio mas lihé. E traspaso di Kòrsou òf Antia pa Ulanda ta hopi grandi i hende ta kere ku e ta fásil i e muchanan einan mester di un hende ku por tene nan na man. Nos kultura tambe ta pidi esei pasobra nos ta kuida bon di nos yunan i nan ta sinti dushi i di mes den un bia mester laga lòs. E intenshon ta pa e keda den kontakto ku e muchanan aki un pa un i pa e wak e situashon i por yuda nan pa evitá prevení ta mihó ku kura pa no ta ora e baka hoga na pos, e ora ei ke tuma akshon. Nan ke purba segun Miraila pa delantá tuma kontakto ku e studiante pa gui’é paso a paso pa e sa kiko ta hasiendo.

Tim pa yuda hóbennan....

Huntu kuné, tin un konsehero di estudio ku ta un antiano tambe i tin un büró di antiano ku si e mucha su problema bira muchu grandi i mester di yudansa profeshonal por bai einan i nan ke yega na un dosente di ulandes ku por yuda tambe ku e parti di ulandes. Esaki teniendo na kuenta ku e ulandes te ainda ta un problema basta grandi serka nos studiantenan. E mucha tin di yega Ulanda i kustumbrá ku tur loke tin na Ulanda, ku e libertat pero ora nan haña problema nan por ekspresá mihó na papiamentu i p’esei nan ta sòru pa e yudansa profeshonal ta na papiamentu. E studiante ku yega pa buska yudansa ta topa ku e hende ku ta dominá su mes idioma, hende ku ta komprondé e hóben su kultura tambe. E mucha e ora ei no ta hañ’é  ku e idioma tambe aserka ku e tin di splika loke e ta sinti, e por tin bèrgwensa i tur esei nan ta sòru pa tin un tim antiano pa yuda e muchanan.

Problema basta grandi di studiantenan ku ta faya....

E problema di e studiantenan ku ta kai for di nan estudio na Ulanda ta basta grandi segun Miraila Bernadina-Theodora a bisa Djasabra. El a splika ku últimamente Hogeschool Rotterdam a informá ku 76% di e hóbennan ta kai for di e estudio ku nan a kuminsá kuné einan. Esei ta a base di un investigashon hasí, i mester kambia e kos ei. “Nos mester pensa ku nos ta hendenan ku ta bai dilanti i a bin na mi kurason pa mi yuda e hendenan aki pa asina nos sòru ku e 75% poko poko bira ménos. Mi ta spera ku e mayornan tambe ta pensa riba esei i no ora e yu ta bai pero pensa riba e guia einan ki ta hopi importante. Hopi bia ta balotá e guia ei pero mester paga bon tinu na dje pa e mucha por keda den e ritmo”, segun Miraila.

Yuda e hóbennan for di Kòrsou....

For di Kòrsou mester kuminsá yuda e mucha i no ora e yega Ulanda so. For di na Kòrsou segun Miraila mester papia ku e mucha hopi. Ta den kontakto ku e mucha. E mucha sa ku e tin un presupuesto pa e por studia kuné pero e no sa kiko e konsekuensianan ta si e 4 añanan di estudio bira 5, 6 òf 7 aña, ku ta nifiká ku e studiante a kasi dòbel e debe ku e lo a kaba kuné den 4 aña manera e estudio lo mester tabata. Mester konsientisá nos hóbennan studiante pasobra aweró nan ta pagando un fiansa di un kas sin tin e kas. Aweró e tin di forma su famia i mester yega na su kas, e hóben ta spanta ora e kaba su estudio i kiko e tin di paga bèk. Esei ta e problema i bo no ta felis pasobra sèn lo no yega. Mester konsientisá e muchanan i konsientisá nan kon atendé ku nan sèn. Ta duna nan guia kon atendé ku nan presupuesto i kontrol’é ku nan ta hasié tambe. Ta tuma kontakto ku e studiante pa mira kon e ta atendé kuné. I si atendé e muchanan for di tempran, por yuda nan pasobra e mucha den problema no ta tuma e paso di buska yudansa. I p’esei nan ta tuma e paso di puntra e mucha di yud’é promé e problema yega.

Eskoho di estudio....

Loke tambe segun Miraila ta un problema ta e eskoho di estudio. El a splika ku tur mucha mester hasi un investigashon di e sorto di estudio ku ta bai na nan interes. Tin hopi manera pa hasié i nan ta hasié ku e mucha dor di lag’é kontestá preguntanan i pa asina sa kua estudio ta pas kuné. Maske bo a skohe pa algu ta bon pa hasi e tèst aki i asina kompará nan. Asina delantá ta pensa riba futuro. Si bai hasi estudio sin hasi e tèst, i aweró tin problema e hóben mester kambia i kuminsá di nobo i tur esei ta kosta hopi sèn. E kuenta final ta keda presentá.

Trein e studiante pa nan por guia nan koleganan studiante....

Miraila ta traha na Erasmus Universiteit i su trabou ta guia studiantenan. Nan ta traha na fakultat ekonómiko pasobra mayoria mucha ta bai e estudio di ekonomia. Nan tin mas òf ménos 2500 mucha pa aña. Nan ta guia e muchanan di e di dos aña pa nan por duna guia na esnan di promé aña. Miraila a bisa ku nan ta paga e muchanan pa por guia e otronan. I loke nan ta hasi ta siña e mucha kon e tin di siña. Antes ta djis siña pa hal un bon punto pero tin maneranan segun Miraila ku ta proba kon mester siña. I tur esei nan ta hasi den e sosten virtual na hóbennan.

Motivá....

Pa loke ta mucha di kua estudio i di ki famia ta kai mas lihé for di nan estudio Miraila a bisa ku esaki ta varia. E ta dependé di e motivashon di e mucha. E por ta di Havo i VWO super bon motivá pero tambe tin esun di MBO ku tambe ta mas motivá ku esun di Havo i VWO. I e situashon na kas di esun mas ku otro no ta hunga masha ròl. E motivashon di e mucha ta determinante. Nan ta traha pa motivá e muchanan, keda papia ku nan. Yuda nan i pa e muchanan por bira mas motivá pa wak kiko nan ta bezig kuné i kon tin di hasié.

Hopi reakshon....

Den e siman ku Miraila tabata na Kòrsou pa hasi su mes konosí el a bisa ku el a haña hopi reakshon. Hendenan ta hopi interesá i e ta tumando kontakto i ya tin e promé klientenan. E ta masha kontentu ku prensa na Kòrsou ku a dun'é e oportunidat pa por a trese e proyekto aki i yuda studiantenan. El a bishitá direktivanan di skol i e tabata reuní ku ministerio di enseñansa, UDC. El a kana hopi kaminda. Esaki ta promé bia segun Miraila ku e ta presentá e sosten aki na Kòrsou i e ta spera ku e mayornan lo tende i tuma informashon. Informashon ta grátis i asina por orientá kiko por i kiko no por.

Ta buska spònser...

E guia aki el a bisa no ta kostoso. Tur kos ta dependé kuantu e mucha mester i ki presupuesto tin pa kubri e gastunan. I nan ta bezig ku un proyekto pa e mayornan ku no por paga. Esei tambe ta importante pero nan tin derechi riba nan chèns den bida i den e kuadro aki a skibi basta komersiante na Kòrsou pa por spònser un studiante. Ya tin sierto banko ku a bisa di ta bai pens’é. Te ainda no a haña niun ku a duna palabra ainda. Miraila ta kere no solamente empresarionan pero si un hende ku tin poko moda i ke sostené un studiante por hasi esaki. El a bisa di ke laga e hende ku ta paga pa e mucha sa kon a bai i den kiko el a hinka su sèn.

Pa loke ta e desishon den prinsipio di Hogeschool Rotterdam di no kier a tuma e muchanan ku ta bin di Kòrsou mas mirando nan grado haltu di faya ku nan estudio, Miraila a bisa ku ya nan a koregí esaki i a bisa ku no ta bin buska mucha aktivamente na Kòrsou mas pasobra hopi mucha ta kai afó i nan ta invertí muchu i haña ménos pero e muchanan ta ketu bai wèlkòm.

I meskos ku nan ta hasi nan mes konosí na Kòrsou, na Ulanda tambe nan ta hasiendo nan mes konosí pa ora e yu di tera yega i e mester di yudansa, sa ku por duna Virtual Youth Support su nòmber pa yuda e muchanan. I pa esun ku ke yudansa/sosten por tuma kontakto via e wèpsait www.virtualyouthsupport.nl.