WILLEMSTAD.- Parlamentario sr. Eugene Cleopa ta bisa ku e tin motibu pa kere ku tin motibunan pa a asfaltá su kaya di kas i yega te na altura di su kas, i laga sobrá dje kaya aki sin drecha. I esaki lo por tin di aber ku polítika, anto nèt den e periodo di kampaña aki pa elekshon. Asina e ta bisa den un karta ku awe el a dirigí awe na Minister di Tráfiko, Transporte i Planifikashon Urbano, sra. Zita Jesus-Leito.

Den su karta sr. Cleopa ta bisa ku el a tuma nota ku e proseso pa asfaltá nos karteranan a kuminsá. E mester bisa ku e ta hopi kontentu ku esaki mirando ku anteriormente el a manda karta na Gobièrnu na mas ku un okashon enkuanto di situashon di nos kareteranan ku no ta den bon estado.

Pero el a bin tuma nota ku den e kaya kaminda e ta biba tin trabounan di asfaltamentu di kaya ta tumando lugá. Sinembargo loke sigur a hala su atenshon ta e echo ku a asfaltá mitar di e kaya i un pida mas despues ku pasa su kas. Esaki p’e no ta akseptabel mirando ku ta krea e impreshon ku sea el a pone preshon òf a regla pa asfaltá e kaya dilanti di su kas i sobránan nò. Si ta asfaltá un kaya mester hasi esaki kompleto i no mitar manera awor aki ta e kaso. Pa hopi tempu habitantenan den e kaya aki prinsipalmente a pidi pa hasi algu na e kaminda aki ku ta den mal estado. Pues en prinsipio e ta hopi kontentu pa tur hende, pero mester drecha e kaya kompletu si.

Segun Cleopa, basá riba esaki e tin solamente un (1) pregunta relashoná ku e kaso aki pa Minister di enkargá ku infrastruktura:
1. Kiko ta e motibu ku a asfaltá mitar Blomonteweg so i no henter e kaya?