WILLEMSTAD.- No ta nesesario pa un hende tin miedu di tuma e vakuna di COVID-19. E  angua ta ser atministrá na brasa, pero e vakuna ta bini ku sierto efektonan sekundario di término kòrtiku. Un dje efektonan ta ku e persona por keda ku doló na e aria unda a pasa e angua, aunke pa e siguiente dia mes e doló a pasa. Por sinti tambe kurpa kibrá, kisas un tiki kansá. Segun dr. Jerry Semper, e efektonan sekundario aki asta ta nesesario pa motibu ku dje forma ei lo por sa si bo sistema imunológiko a ser stimulá. No ta tur hende lo sinti e mesun efektonan ei, pero si esei a e kaso konsiderá esei komo un bendishon pasobra e vakuna ta funshonando.

Mas aleu tin hendenan ku lo por tin un tiki doló di kabes; doló di múskulo i doló den skarnir.

Mas aleu dr. Semper a splika ku tin komo 11 ingrediente den e vakuna di Pfizer. Investigashonnan ekstenso  hasí dor di médikonan spesialisá den alergia a indiká ku di tur e 11 ingredientenan den e vakuna, ta solamente unu (PEG) un hende por ta alérgiko na dje. Awor si un hende tin miedu di e ingrediente aki, anto e lo mester tin miedu di usa ‘make-up’ i ‘wipes’ pa beibi. Ta produkto ku nos tur  ta usando tur tempu sin sa. Pero awor ku e ta den un vakuna, tin hendenan ku ke kousa pániko innesesario. Pues echo ta ku un hende por tin un reakshon alérgiko riba e vakuna.

Tin otro reakshon alérgiko pisá, pero e chèns ku un hende lo haña esaki ta di 10 den 1.000.000 hende.

Pero ta bon pa sa atrobe ku aki na Kòrsou despues ku bo haña a vakuna bo ta bai sinta den un kamber di opservashon pa 15 minüt i unda tin dòkternan pendiente pa intervení si algu sosodé. I aunke e chèns a masha chikí ku un hende lo por duna reakshon hopi severo riba e vakuna, tòg a krea e fasilidat na SEHOS pa por trata kuater pashènt. I maske dòkternan a ser informá i kapasitá riba e tereno aki, tòg den e siman dje proyekto piloto aki a repasá e materia pa asina tur hende bon na altura di un ke otro.

Segun dr. Semper, e pueblo a konfia su salú den man di dòkternan i komo tal ta nan deber di hasi lo máksimo pa tur kos kana na drechi.