WILLEMSTAD.- Un di e doló di kabes di mas grandi di outomobilistanan, ta kayanan den mal estado i yena ku buraku. Porfin por bisa ku esaki lo bai keda aliviá.

Minister di Tráfiko, Transporte i Planifikashon Urbano Charles Cooper a konfirmá pa EXTRA ku trabounan a kuminsá.

Na komienso di e siman aki ya a saka un trùk di asfalt pa bai yena algun kaya ku ta prioridat. Pero entre mañan i djaluna próksimo lo atendé ku e masa mas grandi di kayanan den mal estado i burakunan riba kaminda. Ta bai kuminsá yena buraku ku asfalt pa por duna outomobilistanan un alivio temporal, pero próksimamente lo  kuminsá ku trabou di drecha kamindanan den mal estado di un forma struktura i esnan ku tin mas prioridat.

E trabou di yenamentu di asfalt ku ta kuminsá entre mañan i djaluna ta den man di tres kontratista ku lo sòru di hasi e trabou di un forma korekto i responsabel.