WILLEMSTAD.- No opstante ku EXTRA a lansa algun siman ariba, e edifisio ros na altura di Banco di Caribe na kuminsamentu di Kaya Grandi di Otrobanda a kuminsá plama for di otro. EXTRA a konstatá ayera ku parti di e bentananan a kuminsá kai abou. Nan a kai riba alsera, kaminda tin hende i mucha (di skol) ta pasa. No ta masha kla kiko ta warda pa tuma medida. E parti ku ta tira pa Kaya Grandi ya kaba a kai den otro. E dak ta totalmente destruí.

EXTRA a konstatá tambe ku den e kurá di e edifisio tin awa pará ku un gran kantidat di sangura. Awor ku áwaseru ta kayendo, tin indikashon ku dia pa dia e edifisio ta birando mas suak. Ya kaba diferente di e bentananan ta den un estado di deterioro serio i e portanan ta kibrá. Den pasado a sera e portanan ku blòki i semènt pa hendenan ku no tin nada di buska einan, manera drogadiktonan molestoso, no ta drenta e lugá. E edifisio aki ta parti di un serie di edifisio ku a deteriorá último simannan despues di e yobidanan fuerte ku tabatin.

EXTRA a papia tambe ku algun habitante den e área ku ta bisa ku nan no ta komprondé di kon no ta tuma akshon. "Kisas gobièrnu a lubidá kaba kiko a pasa ku e muraya di karnaval?", asina un di nan a puntra. E ta tene su kurashon pa e kantidat di hende ku ta pasa na e skina aki tur dia. Tantu hende grandi komo mucha. "Tur dia nan ta pasa einan", asina el a bisa.

EXTRA a publiká resientemente ku e doñonan di e edifisio ta konsiente di e deterioro serio aki. Nan kier basha e lugá abou pero pa hasi esei nan mester di pèrmit di gobièrnu. Nan a entregá un petishon kaba komo ku e edifisio ta konsiderá unu monumental, sigur pa loke ta trata su fachada. Nan ta dispuesto tambe pa konservá esei pero komo ku gobièrnu ta tardando nan a indiká bon kla ku si algu mester pasa, no por tira kulpa riba nan. Te awor aki nan no a haña un kontesta for di e mulina di gobièrnu ku ta mulando hopi lento.

...Riba e pòrtrètnan por mira e deterioro dia pa dia mas serio di e edifisio i parti di e dak ku a bin abou i kai riba kaya. Tambe por mira e awa ku ta para den kurá di e edifisio den un tempu ku ta pidi tur hende kombatí brotenan di awa pa evitá sangura...