Monumento den Breedestraat Punda restourá; A salba otro monumento

Despues di a keda restourá i renová kompleto na 2002, awor a yega momentu pa kambia e biga di heru ku ta karga e fachada di e edifisio di mas bieu di Breedestraat Punda, dediká na Frank (Pancho) Da Costa Gomez. Eksperto den monumento sr Langevelt a hasi e trabou sumamente kompliká di saka e struktura bieu i pone 2 biga nobo ku ta garantisá un bia mas ku e fachada monumental ta keda stabil pa hopi aña mas. Tur esaki a sosodé danki na e tremendo kooperashon di OW, ministerio di VVRP, Kuerpo Polisial pa asina por a realisá e trabou kompliká aki. Riba e diferente potrètnan un bista di kon e biga tabata, momentu ku ta kitando esaki, e esfuersonan di mannan fuerte i ekipo pisa pa por a pone e biga nobo, remplasando esun bieu i un bista kon e edifisio a keda na final. Tur esaki a sosodé kuidadosamente pa asina no kousa niun daño na e edifisio monumental menshoná.