WILLEMSTAD - E hóben outfielder yu di Kòrsou Edmond Americaan a firma ku e organisashon di Liga Grandi, Chicago Cubs. Manera EXTRA a informá luna pasa, Americaan a keda di ‘draft’ for di Chipola College na Florida pa Cubs. Edmond Americaan a anunsiá e firmamentu riba su página di Instagram ku e ta hopi kontentu i bendishoná pa firma ku Chicago Cubs gradisiendo su famia, su coachnan i tur ku a sostené i yud’e durante su karera.

Americaan a keda di draft tres aña siguí pa un ekipo di MLB. E biaha aki tabata e ekipo di Chicago Cubs ku a hasi esei i a logra firme tambe. Na 2017 tabata e ekipo di Arizona Diamondbacks. Na okashonnan anterior Edmond Americaan a opta pa tòg sigui ku skol. E tabatin otro temporada eksitoso i a titulá kampion pa dos aña sigui di World Series NJCAA Junior College ku Chipola College.

Edmond Americaan no ta un deskonosí den beisbòl di Kòrsou. Hungando den e organisashon di Sta. Maria, Americaan a bai Williamsport ku selekshon di Little League Liga Pabou. Despues komo parti di e proyekto “Studia den Region” el a bai Merka hungando beisbòl na Trinity Christian Academy Highschool. Einan huntu ku vários otro pelotero yu di Kòrsou el a guia TCA na nan promé título komo kampion di Florida di nan divishon.