WILLEMSTAD.- Den futuro “EFO toets” lo no sirbi mas komo un instrumento determinante pa atmishon di un studiante pa kualke nivel di estudio di enseñansa avansá. Esei por konkluí for di un karta emití for di despacho dje Ministerio di Enseñansa, Siensia, Kultura i Deporte. Segun e  karta aki, segun Areglo di Estado di Kòrsou, enseñansa ta un dje tópikonan di preokupashon di gobièrnu. Pero na momentu di tuma desishonnan, e Minister enkargá ku e kartera aki ta tene kuenta ku kuadronan legal i tambe posishon di tur otro aktor den e sektor.

Final di aña eskolar 2023-2024

E desishon pa atmishon pa un skol Havo òf Vwo den e promé aña ta basá riba e rapòrt edukativo ku ta ser menshoná den e lei di Enseñansa di Fundeshi. Esaki defakto ta forma e regla básiko pa atmishon na Havo of Vwo. Artíkulo-1 di e disposishon di rapòrt edukashonal enseñansa di fundeshi ta indiká bon kla ku  ta e rapòrt edukashonal ta duna e informashon básiko riba prestashon i e posibilidatnan enseñansa di un studiante, i a base di esaki e fluho pa enseñansa avansá ta tuma lugá.

Un studiante ku solamente a base di e rapòrt edukashonal ser atmití den e promé aña na nivel di VSBO ta sigui formashon den un direkshon, a ménos ku e studiante ei haña atmishon na un skol dirigí riba labor. Den kaso ku tin studiantenan ku a haña un konseho pa bai Havo, lo por hasi un investigashon riba nan habilidat pa sigui e nivel di estudio ei, poniendo tambe aserka e ‘EFO-toets’. Pa studiantenan ku a risibí un konseho pa VSBO, e eskoho lo keda den man di mayornan di e alumno si nan ta laga e mucha partisipá na e ‘EFO-toets’. Alumnonan ku a base di nan rapòrt edukashonal a haña un konseho pa VSBO lo por hasi e transferensia a base di e konseho en kuestion. E tèst riba nan habilidat no ta un eksigensia pa por ser atmití na VSBO.

E ròl di EFO

Segun e karta di e ministerio, e EFO lo por kontinuá na final di aña eskolar 2023/2024, pero solamente e mester ser usá ku e meta pa kual el a ser desaroyá, ku ta komo un instrumento, huntu ku e rapòrt edukashonal, pa un alumno ku ta ser atmití den e promé aña na Havo. Por sierto, konforme lei un investigashon riba habilidat di un alumno pa e promé aña di Havo/Vwo solamente lo por tin komo resultado ku e mucha ta apto òf no pa atmishon na e nivel ei di enseñansa.

EFO lo no por tin komo resultado: VSBO, AGO i tampoko ku tin di regresá enseñansa di fundeshi òf ku no ta atmití den enseñansa avansá. Esaki ta algu empugna ku lei.

Final di aña eskolar 2024-2025

Teniendo kuenta ku tur loke a ser tresé dilanti relashoná ku atmishon di Enseñansa di Fundeshi pa Enseñansa Avansá, a tuma e siguiente desishon pa loke ta aña eskolar 2024-2025: EFO lo no ser mantené mas komo instrumento komplementario na final di aña eskolar 2024-2025 pa basa e atmishon pa e promé aña eskolar na Havo of Vwo. Pero mayornan lo ser informá na final di e aña eskolar kiko nan por spera, esta ku atmishon na kualke forma di enseñansa avansá na final di aña eskolar 2024-2025, solamente lo ta basá riba e rapòrt edukashonal, kual tin su base legal den un disposishon ministerial.