Fit-20 ta un konsepto ku a kuminsá na Kòrsou na aña 2019, ounke e ta konosí mundialmente pa mas di 10 aña kaba. E konsepto aki ta nifiká ku durante di 20 minüt pa siman bo ta keda someté na ehersisio ku ta basta pisá pa bo múskulonan, partikularmente e fibra di bo múskulonan ku normalmente un hende no ta usa si no ta pa karga kos super pisá so. 20 minüt pa siman, sin soda, den bo paña di trabou, den un espasio kómodo, i hopi limitá na hende. I Djasabra a papia ku Karin Visser ku  a kuminsá ku e konsepto aki na Kòrsou, 2 aña pasá.

Trein e múskulo di mas profundo…

Fit20 ta un frankisia mundial di studionan ku entrenadornan personal. Nan ta ofresé un método úniko. E training ta altamente intenso pero poko poko i solamente 20 minüt pa siman. I e ta funshoná segun Karin a konta Djasabra. E training ta riba e mas profundo di bo ‘spier vessels’. Den un múskulo tin 4 diferente ‘spier vessels’ profundo. Di pafó bai paden tin e múskulonan ku ta keda someté na e aktividatnan di henter un dia. Nan por restablesé fásilmente i p’esei un hende por kana i hasi tur loke mester hasi durante di dia. E “vessels” mas profundo ta keda usá solamente ora bo mester di hopi forsa por ehèmpel hisa sakunan pisá. Den e trainingnan aki ta usa tur e spier vesselsnan, kansa nan i asta esun di mas profundo. I e di kuater ta esun ku ta usa kasi nunka, i mayoria hende no ta us’é. Pero den e trainingnan na Fit20, riba e aparatonan spesial pa ehersisionan den ‘slow motion’, ta us’é te na momentu ku no por mas i asina ta yega na e di 4 spier vessels, segun Karin a splika. I ora usa esei, e múskulonan tur ta spanta i sa ku nan tin di sobrebibí. E ta duna un prek na e mente indikando ku nan mester ta mas fuerte. I e mente ta sòru pa krese hormonanan pa e múskulonan ei.


5 dia pa rekuperá…

Den e training di Fit20 ta usa tur e múskulonan di mas grandi riba 6 diferente aparato. Por papia di 2 minüt pa kada aparato i na momentu ku e mente haña e preknan,  i e mente ta sòru di ta mas fuerte. E múskulonan ta keda bombardiá ku tur e hormonanan na momentu ku nan ta sosegá. E spier vessels di mas pronto ei mester di 4 pa 5 dia pa e rekuperá. Na un Gym normal no mester di tantu dia asina pa rekuperá, pero den fit20 si mester di por lo ménos 5 dia pa rekuperá te asta 7 dia.


Oumentá forsa…

Loke e trainingnan aki ta yuda kuné ta pa oumentá e forsa di e persona. E ta hasi tambe mas fuerte ku e persona ta mas fet i mas importante ta drecha e salú. Lo bo ripará ku despues di 1 luna bezig bo ta sinti ku bo tin mas energia. Si papia kiko presis Fit20 ta yuda kuné, Karin a bisa ku tin hopi kontesta pa e pregunta ei. El a kuminsá ku algu masha importante den e momentu aki. Sarkopenie ta momentu ku e forsa di bo múskulonan ta baha. For di bo 25 aña bo ta kuminsá pèrdè mas òf ménos mei porshento di e forsa muskular pa aña. Kada hende por konta pa nan mes kuantu forsa muskular nan ta pèrdè di nan no trein ku forsa. I no ta papia aki di deporte i kore baiskel ku ta yuda un tiki. Pero si no trein ku forsa, por pèrdè e masa muskular ei. Na momentu ku pèrdè e masa muskular, por bin tur tipo di keho di salu manera sobre peso, diabétis, doló, na garganta, na lomba, ostioporosis, rudia suak, un sistema inmunologia suak. Tur ta kehonan ku ta keda okashoná ku bahada di e masa muskular. Na momentu ku bai oumentá e poder muskular ei, tur e kehonan di salú ta baha tambe. Karin a bisa ku training di forsa ta masha importante.

 

Trein ku disiplina…

 Ku e training aki den 20 minüt a siman ta hopi bon. Ora bai gym i bai trein ta masha dushi pero tin yen hende ku no tin e tempu pa hasi esaki, nan ta drùk òf asta no ta gusta hasié. Pero Fit20 tin e manera pa den 20 minüt pa siman di forma intenso trein. Ta importante si pa hasi ku regularidat. No ta e intenshon pa tuma un abono i no bai. Tin hende no tin e disiplina. Pero na momentu ku tin un entrenadó personal kla para ta warda, tin un sita stipulá i den 20 minüt trein, e ta bira mas kómodo.

No ta soda…

E training ku ta bai den ‘slow motion’ ta sòru ku e kliente no ta soda. Esaki ta nifiká segun Karin ku e persona por kana drenta na momentu ku e tin pouze di su trabou, den su unifòrm, ku guia di e entrenadó e ta trein.

 

Trein pa salú…

E konsepto aki hopi hende no ta komprondé si nan no eksperensia segun Karin. Por splika di e método di 20 minüt pa luna, e hende no ta kere fásilmente. For di añanan nos a lanta ta tende ku mester trein por lo ménos 3 bia pa siman, pero ku e entrenamentu aki ta logra e mesun kos. Otro kos ta si e hende ke duna su kurpa forma. Esei si no por hasi na Fit20. E training ta apsolutamente pa salu. Karin ta tende e komentario di hendenan despues di 3 luna ku nan ta sinti nan mas fuerte, nan ta drumi mihó, salú ta mehorá. E studio no ta unu grandi i p’esei no por tin mas ku 2 hende ta trein na mesun momentu. E entrenadó personal sa presis pa kada hende kon e mashin mester ta programa. E entrenadó por subi i asta baha e peso si mira ku e no ta bai bon. Tur loke e persona tin mester na e momentu ei.

 

Pa tur edat…

Tur hende por hasi Fit20, for di 1.50 meter esaki debí ku e aparatonan ta pa sierto haltura.  Esaki ta nifiká ku for di 14 aña e persona por ta den e gym. I na Hulanda tin hende te 90 aña ta trein den Fit20. Ta adaptá kada mashin na e persona su salú, su peso i asta si e ta sinti sierto malesa tur esei ta adaptá na dje Fit20 ta situá riba Cas Coraweg ariba di Dasia Sport.  Nan tin Facebook i wèpsait kaminda tin tur klase di informashon.

Guia di kome…

I banda di tur esaki Fit20 tambe tin un yudansa na esnan ku ta deseá esaki pa guia e persona kiko i kon pa kome. Karin a splika ku aktualmente e mes ta desaroyando un programa pa duna tur kliente pa nan por sòru pa un bon salú.

1 COMMENT

LAGA UN KOMENTARIO

Please enter your comment!
Please enter your name here