WILLEMSTAD.- Entre di awe nochi lat (20 di yanüari) i djaluna mardugá riba Kòrsou, por mira un eklipse total di luna. Na Kòrsou e fase parsial di e eklipse aki ta kuminsá 27 minüt pa 12 di anochi. E fase total ta kuminsá 19 minüt pa un di djaluna mardugá i na e momentu ei hinter e luna lo ta kasi sukú. E parti kulminante di e eklipse ta tuma lugá 01:12'or di mardugá i e fase total ta terminá 17 minüt pa dos di mardugá. Despues di e fase total ta sigui e di dos parti di e fase parsial i despues di 10 pa tres di mardugá e luna lo ta kasi kompletamente iluminá dor di solo atrobe.