WILLEMSTAD.- Un bahada severo den e aktividatnan ekonómiko a produsí un redukshon den e produkto interno bruto di 18.4 porshento pa aña 2020. Asina Ofisina Sentral di Statistik (CBS) a duna di konosé djaweps último. Segun CBS Kòrsou nunka a eksperensia un redukshon asina den e promé añanan. Despues di kuater bahada seguidamente den ekonomia (2016: 1.0%, 2017: -1,7%, 2018: -2.2 % i 2019: -3.4%) Kòrsou ta aterisá den un reseshon profundo di korona, esaki ta nifiká ku e tamaño òf volúmen di e ekonomia ta hopi mas chikitu ku e aña anterior.
E promé kalkulo tentativo riba e desaroyo di ekonomia na Kòrsou ta relashoná ku e desaroyo real, esaki ke men ku e ta korigí pa desaroyo di preis. Ta kalkulá e desaroyo ekonómiko a base di volúmen ku tabatin den e proseso di produkshon i a base di e desaroyo koyuntural.

Pandemia di COVID-19
E pandemia di COVID-19 a sòru prinsipalmente pa un bahada den e aktividatnan ekonómiko bou di kasi tur ramo.
Por ehèmpel e reseso konstante di e aktividatnan industrial tabatin un bahada signifikante di 56 porshento den e ramo di Industria. E rason prinsipal ta e echo ku aktividatnan di refineria den aña 2020 a baha. Otro aktividat ekonómiko den e ramo aki ku a baha mirando nan produkshon di benta ku tambe a sera temporalmente den 2020.
E aktividatnan ekonómiko den ramo di Komersio a baha drástikamente ku kasi 21 porshento. E bahada aki a keda okashoná dor di bahada den importashon di produkto i e diferente aktividatnan komersial di
e negoshinan.

Transporte i Komunikashon
E tendensia den e ramo di Transporte i Komunikashon ta mustra un bahada konsekutivo di sigur un 23 porshento den e aktividatnan ekonómiko kompará ku e aña anterior. Pa loke ta trata transporte e aktividatnan den haf i aviashon a baha en general. E aktividatnan den haf a wòrdu afektá prinsipalmente di barkunan di petroli, i e barkunan manera entre otro barkunan ku ta keda di loods den nos haf, kònteinernan tambe a baha na kantidat grandi. Aki nan mester kòrda riba e influensia ku ta sigui dor di e echo ku Refineria a kai afó. E aktividatnan di barku krusero nan i tambe e pasaheronan a bira nulo for di aprel 2020 despues ku e pandemia a eskalá. E aktividatnan di aéreo a baha a konsekuensia di bahada di kantidat di pasahero i e kantidat di avion ku a aterisá i tabatin a konsekuensia di esaki ménos karga aéreo. En kambio den e sektor di Informashon i komunikashon a opservá un kresementu den 2020.