...Abogado Shalton Hato defensor di gobièrnu...

WILLEMSTAD.- Eks-bosero di Ministerio Públiko (OM), Norman Serphos ta pèrdè kaso di retiro ku el a entamá kontra gobièrnu di Kòrsou.
For di den luna di yüli, korte di ámtenar a trata e kaso di Serphos kende a bai korte pa bringa su retiro.
Manera ta konosí, Serphos a risibí su retiro, despues di a reakshoná riba facebook di forma no profeshonal di un persona ku a fayesé aksidentalmente. Esaki despues ku e persona en kuestion algun dia promé ku e fayesé a ofendé Serphos riba facebook.
Serphos a gaña riba e reakshon ku el a publiká dje defuntu riba facebook i tambe a kometé denunsia falsu. Esaki a kondusí ku OM a akus’é di denunsia falsu i den korte di promé instansia na aprel 2019, Serphos a haña 40 ora inkondishonal.
Serphos a bai korte pasobra e ke su trabou bèk den gobièrnu.
E tempu ei despues dje veredikto Serphos tabata di opinion Ministerio Públiko a lag’é kai manera fruta putrí despues di a laborá hopi aña den e aparato.
Ayera korte di Ámtenar a dikta ku no ta gobièrnu di Kòrsou i Raad van Minister ta e órgano outorisá ku por duna un retiro komo kastigu.
Korte ta di opinion ku Serphos komo eks bosero e tabata kara di ministerio públiko i a faya gravemente ku su obligashon komo ámtenar. El a hasi doló na famia dje defuntu ku su remarke, el a gaña OM i tambe a duna denunsia falsu. Ku esei el a hasi daño na Ministerio Públiko i tambe e konfiansa di un bon funshonamentu di e organisashon. Apesar ku Serphos formalmente no tabata nombra bosero di OM, pero el a fungi den tal funshon si. P’esei na opinion di korte, por bisa ku Serphos tabata e kara di OM.
Hues ta di mesun opinion ku abogado di gobièrnu mr. Hato, ku un ámtenar ku ta hasi tal funshon tin eksigensianan haltu p’e ta kuidadoso, konfiabel, íntegro i kumpli ku su obligashon.
E komprobashon di Serphos tantu apart komo konhuntamente, mester kalifiká komo no kumplimentu di su obligashon gravemente, segun hues. Komo un hende aktivo riba media sosial, Serphos mester ta sa mihó dje rísiko ku loke el a pone por keda plamá den mas medionan sosial i p’esei e ta responsabel p’esaki. teniendo kuenta ku tur e puntonan ariba indiká, korte ta rechasá e opheshon di Serphos kontra di su retiro.
Tantu gobièrnu komo Serphos den e kaso aki tin 30 dia pa apelá e sentensia na Korte di Apelashon di kasonan di Ámtenar.