WILLEMSTAD.- Ayera e tribunal di Hof a bai di akuerdo pa alarga e “aresto domisilio” di  eks  direktor di Giro bank  Eric Garcia.

Ta trata di e kaso ku a haña e nòmber Astro di kual Garcia a keda kondena na un kastigu di 4 aña mas 19 mion florin ku e tin ku paga bek, si no e tin ku sinta 3 aña mas. Fiskal Janssen a hasi un demanda di 5 aña i a pidi ekspropiashon di 10 mion  dòler.

Garcia a keda detené den sala di korte mes i hiba prizòn direktamente, despues di a tende su kondena. Garcia a apelá su sentensia pa motibu ku e ta haña e kastigu demasiado haltu. Tambe el bisa ku el a fia e dos invershonistanan merikano S. Silver i W. Hu e plaka pa paga bek, miéntras ámbos ta bisa ku ta trata di un invershon.  Esaki tabata e motibu ku abogado mr. Martina a pidi pa skucha ámbos persona den e kaso.

E tribunal a bai di akuerdo pa skucha ámbos pa asina haña sa kua invershon, unda e plaka a bai i si nan tin intenshon di paga bek.

E intenshon tabata pa ámbos invershonista bini Kòrsou, pero nan no tabata ke esaki i p’esei a bai di akuerdo pa skucha nan via konferensia di video komo testigu.

E invershonista Hu kier a distansia su mes i no kier a hasi deklarashon mas, pero esaki ya no ta posibel  i tin ku deklará den e kaso aki, pa tribunal di Hof haña un bista di e kaso.

Despues di a enkontra problema ku su salu den e instituto penitensiario SDKK, abogado di e akusado mr. Martina a pidi Hof pa suspendé detenshon di Garcia, mirando ku su salu a bai atras i e kuminda ku e ta haña no ta adekuá pa su salu. E tribunal di Hof a bai prizòn pa asina wak e situashon den kual Garcia tabata, pa despues bai di akuerdo ku mr. Martina i duna Garcia aresto domisilio  te ora ku bin un solushon.

Esaki a nifiká ku Garcia no a haña banchi, pero tin ku keda den su kas. Solamente ora e ta bai dòkter òf atendé ku hustisia e por sali, pero  tin ku mèldu esaki na Reclassering.

Garcia ta keda akusá di malversashon komo curator, falsifikashon di entre otro dokumentonan di banko Maduro na nòmber di Banco Maracaibo N.V. i tambe labamentu di plaka.

Tur esakinan den e periodo di 1 di yanüari 2010 te ku 20 di yüli 2016 na Kòrsou i tambe Estádos Unídos .

Segun e akusashon, Garcia lo a malversá un montante di 11 mion dòler merikano for di Banco Maracaibo N.V.

Tambe e ta keda akusá di a falsifiká e dokumentonan.

Mirando ku e no tabatin e prueba ku el a fia Silver i Hu ku ta biba na Merka e montante pa kumpra 58 % di e akshonnan di Giro, el a disidí di traha un prueba pa hues komisario den kompania di Silver i Hu.

Durante tratamentu di e kaso el a splika ku el a yega di fia algun akshonista 5 mion di kual nan a paga bek den ménos ku un siman.

Pues ta algu ku tabata sosodé riba un base normal. Hues a haña esaki hopi straño mirando ku e fiansanan e ore’i tabata bai sin interes.

E kaso lo keda trata dia 14 di mei integralmente i te ku e dia ei Garcia lo keda den aresto domisilio.  Despues di ayera te ku 14 di mei, tantu Silver komo Hu mester keda skucha komo testigu.