Adikshon na kasino a pone ku e tabata hòrta sèn for di herederonan

WILLEMSTAD.- Eks kahera di R.B.C bank  V.R. (43) ayera a presentá den sala dilanti hues pa motibu ku el a atmití di a kue  NAF 250.450,34, for di 13 kuenta di klientenan di e banko. Entre otro herederonan ku tin sumanan kuantioso riba nan kuenta.

El a bisa ku e tabata kue sèn pa motibu ku e tabatin un adikshon fuerte na kasino. Segun e akusado, e tabata transferí e sèn fo’i kuenta di e klientenan pas’é riba su kuenta òf riba di su yu muhé kaba pe sak’é kèsh.

El a kometé e echo aki den e periodo di 6 febrüari 2017  te ku 17 di yüli 2019.

Segun e  akusashon for di un kliente so el a kue mas di 140 mil florin i  tiki tiki e sobrá 110 mil florin for di diferente kliente.

El a bisa di tabata kue entre 3  pa 10 mil florin kada bes.

E akusado a keda deskubrí na momento ku un kliente a tuma nota ku tin algu ku no ta kuadra ku su sèn i a bai reklamá. Esnan na kabes di e banko a hasi un investigashon interno i a deskubrí loke e akusado tabata hasi. Mayoria di esnan ku e tabata kue sèn tabata herederonan.

E akusado a bisa ku e tabata hopi gordo i tabata haña hopi doló den su spirnan. Relashoná ku esaki e tabata haña remedi pa kalma doló, pendiente pa e bai Colombia hasi operashon.

Ei nan médikonan a kòrta un pida di su tripa i tambe su stoma. Segun e akusado, el a bira adikto na e remedinan di doló i esei tabata pone ku e no por a pensa muchu bon. E tabata kue e sènnan pa e bai kasino. E tabata bai den orario di kome i tambe ora e sali trabou. Hues a puntr’é si e no a kumpra nada pa su mes kas, òf su famia for di e sèn, e akusado a bisa ku tur plaka e tabata gasta na kasino ku e speransa ku un dia e ta gana un suma grandi  di sèn, pa pone e hendenan su sèn bèk. Pero e no tabata gana nada i tabata kue mas i mas sèn. E akusado ta mama di 5 yu.

Fiskal a haña e akusashon probá i a pidi 36 luna kual 18 kondishonal. Den korte sivil el  keda kondená  na 250 mil florin pa paga e sèn bèk ku el kue. Hues Verbeek den su  desishon a bisa ku e akusado a daña imágen di e banko i trese deskonfiansa den e organisashon. Hues a splik’é ku tur kliente ku tin nan kuenta na banko, mester ta trankil i tin konfiansa ku nan sèn ta sigurá i e a trese e deskonfiansa pa  e banko.

Mirando tur esakinan hues ta yega na e kondena di 24 luna  di kual 12 kondishonal mas 3 aña di prueba.