WILLEMSTAD.-  Awe korte di hustisia na Boneiru a dikta sentensia kontra di e hòmber J.B.C pa ladronisia riba un boto. Ta asina ku dia promé di ougùstùs 2018 e hòmber J.B.C a hòrta 500 euro durante di un kontrol ku a tene riba un boto. E plaka tabata den un kluis riba e boto. Den e mardugá siguiente a tuma lugá un robo na bordo i durante di esaki a hòrta mas plaka for di e kluis. Rápidamente despues a detené C i durante di interogashon el a atmití ku el a hòrta e 500 euro. Ministerio Públiko (OM) a haña probá ku el a hòrtá e plaka, pero no por a prueba su envolvimentu den e robo di mardugá. C durante di interogashon a demonstrá duele i a pidi despensa, pero el a kousa, ku su aktuashon, mal reputashon pa Kmar. Fiskal di ministerio Públiko den e kaso aki a hasi un demanda di 40 dia di prisòn kondishonal ku un temporada di prueba di 3 aña i ademas un kastigu di trabou (werkstraf) di 80 ora na benefisio di komunidat. Wes a sentensia e hòmber awe mainta konforme e demanda di OM BES. C ta un eks funshonario di Marina ulandes (Koninklijke Marechaussee, Kmar) na Boneiru.