WILLEMSTAD.- Eks-minister di Hustisia, i aktual parlamentario pa partido PAR, Quincy Girigorie a duna di konosé riba su página di Facebook ku e no a duna pèrmit na produktor Ewout Genemans di RTL5 pa grabashon di dokumental ku a tuma lugá den luna di mei di e aña aki tokante trabou di polis. Girigorie: “Ami komo minister no a duna ningun akuerdo pa Kuerpo Polisial Kòrsou partisipá na grabashon di e dokumental aki tampoko.”

Mas aleu Girigorie a bisa ku: “Si RTL a pidi ami pèrmit pa graba krímen na Kòrsou lo mi a pidi nan enkaresidamente pa graba krímen mas grandi den Haf di Rotterdam serka di nan kas. Meskos ku mi a bisa públikamente despues di deklarashon di alkalde di Rotterdam Ahmed Aboutaleb dia el a bini Kòrsou: haf di Rotterdam ta e “Boka di Europa di entrada di droga”. Esaki Insight Crime den nan rapòrt último a duna di konosé. Segun Girigorie  medionan di komunikashon hulandes ‘mester stòp di ta hipókrita i mustra dede riba Kòrsou pa tapa nan propio sushedat.’ Girigorie ta enfatisá ku Hulanda ta e produktor di XTC di mas grandi na mundu, e importadó di kokaina di mas grandi di Oropa i tin problema grandísimo ku filtramentu di baho mundu den nan ekonomia. ‘Djis wak likidashon di e abogado Derk Wiersum i di sr. Peter R. De Vries resientemente. Mi a komprondé tambe ku tabatin manipulashon pa ku e ròl di KPC den esaki, pero nan mes lo splika un ke otro pronto. Stòp ku hipokresia.” Asina ta e mensahe di Quincy Girigorie.

E ta reakshoná riba programa di televishon di produktor Ewout Genemans tokante ‘e banda kriminal di Kòrsou’. E programa, ku ta titulá ‘Maandag in Ewout: Genemans onderzoekt criminaliteit op Curaçao’ tabata na televishon hulandes djaluna último. Genemans ta trahando pa emisora RTL5.

Genemans a splika ku e ta stima Kòrsou i a bishitá e pais hopi bia kaba. Ku su programa e ke duna atenshon na un banda di e isla ku hopi turistanan no ta konosé.

Pero polis di Kòrsou despues di transmishon di e programa a bisa ku nan ta hopi desapuntá di e resultado.

Segun polis e produktor mes a duna di konosé anteriormente den su petishon, ku e no ta saka nada di Kuerpo Polisial ni di e grabashon ku el a produsí a base di e koperashon ku el a haña di polis, sin e laga e hefe di Komunikashon mira. Polis a duna di konosé djamars último ku: ‘Pa nos sorpresa nos por a tuma nota ku e produktor aki a saka un dokumentario sin ku e produkshon a wòrdu presentá na nos.” Polis a konstatá tambe ku e produkshon ta mustra un bista negativo pa nos pais.