WILLEMSTAD.- Korte di promé instansia ayera a kondená eks minister di posponé kaso di maltrato i destrukshon di kual eks minister S. Josepha (46) ta keda akusá di dje.
E ta keda akusá ku dia 4 di yanüari 2019, el a maltratá su frei di kual e tabatin relashon amoroso kuné pa 5 aña largu. El a chok’é, despues di un diskushon ku segun e akusado lo a sali fo’i man. El a bisa ku no tabata su intenshon niun momento so pa agredí e dama.
Tambe e ta keda akusá pa destrukshon dia 11 di yanüari ku tabata nèt 1 siman despues di e agreshon. Riba esaki e akusado a bisa ku el a bai pa papia ku e dama i ora el a pidié pa habri pe, e dama a ninga redondamente.
Esaki a pone ku el a kuminsá bati e bentananan di kual nan a keda destruí. Nèt na e momento ei polis a yega.
E akusado ayera a presentá den sala di korte pa e kaso keda tratá. El a akseptá tur su kulpa i a bisa ku no tabata su intenshon.
Hues a bisa ku e akusado no a tene su mes na e kondishonnan di prohibishon di tin kontakto ku e víktima.
Den e kaso anterior, fiskal a duna di konosé ku e víktima a deklará ku e akusado ainda ta persiguié.
Mirando esaki, fiskal a pidi pa bolbe pone prohibishon di kontakto ku e dama pa e akusado, mirando ku esun ku a pone promé pe, a vense.
Mama di e víktima den kaso anterior a bisa ku e akusado a purba un bia kaba via mail pa drenta den kontakto ku e dama.
Hues na final a bisa e akusado ku e ta keda atvertí un bia mas, pa no purba di niun manera pa komuniká ku e víktima. No bisa ni bon dia, bon tardi òf sikiera despensa.
Si esaki sosodé tòg, e por hañ’é den problema hopi serio.
E akusado a bisa ku nan tabata un relashon di 5 aña ku el a hiba ku e dama, di kual nan a keiru hopi pafó di pais, hasi hopi kos huntu i tabatin momentonan inolvidabel. P’esei ta difísil pe, pero ku e lo kumpli ku e kondishonnan awor si. Den e rapòrt di Reclassering a sali na kla entre otro ku e akusado ta usa mariwana. Segun e rapòrt di Reclassering, e akusado tin chèns di ripití loke el a hasi.
Mirando esaki fiskal ta yega na un demanda di 8 luna kondishonal mas 4 aña prueba, 40 ora di lès pa agreshon mas guia di Reclassering i sikólogo. Hues a bai di akuerdo ku e demanda, pero a baha e temporada di prueba na 3 aña.