WILLEMSTAD – E ekipo di investigashon Inex 2.0 lo regresá awe Kòrsou for di Ulanda ku otro piesa klave pa solushon di e kaso di robo di 600 kilo di droga for di Warda di polis. Despues ku na desèmber 2021 a hasi vários detenshon, dianan 18 i 22 di yanüari último a hasi algun detenshon tambe na Ulanda di dos sospechoso di 27 i 33 aña di edat. Ámbos lo keda entrega na outoridatnan di Kòrsou.

Wes Komisario  aki na Kòrsou promé ku detenshon di e sospechosonan na Ulanda ya a duna 8 dia di detenshon preventivo. Miéntras tantu ya a prolongá esaki ku 8 dia mas kaba. Un di e sospechosonan detené na Ulanda tabata un eks polis aki na Kòrsou. E eks polis aki lo ta e ‘brain’ tras di henter e robo aki. Tur e otro tres sospechosonan ku a keda detené aki na Kòrsou ketu bai ta sera. E investigashon den e kaso aki ta kontinuá tantu aki komo na Ulanda i no ta deskartá e posibilidat di mas detenshon. Den kuadro di e investigashon aki Ministerio Públiko no por duna mas detaye.