WILLEMSTAD.- ‘Masha bunita a manda nos tur bai yena “draagkrachtmeting” di Dienst Uitvoering Onderwijs (DUO), pero esei no ta yuda eks studiantenan na Kòrsou. Tin kaso kaminda hòmber i muhé mester paga riba 10.000 florin kada unu pa aña. DUO no ta tene kuenta ku ningun “draagkrachtmeting”. E mihó kos ku a keda ta di bandoná Kòrsou i bai biba Ulanda pasobra aya si ta tene kuenta ku e forsa di kompra real di kada kas”. Di e forma ei eks studiantenan ku EXTRA tabata den kontakto kuné a reakshoná indikando ku nan no por mas.

Algun tempu pasá Marilyn ALcala-Walle, aktualmente minister di enseñansa tabata dediká hopi atenshon na e kasonan aki pa medio di su fundashon MAW. A logra trese DUO Kòrsou unda a tene seshonnan di informashon ku mayornan i eks studiantenan pa tur hende komprondé kon e situashon ta sintá den otro. EXTRA tabatin kontakto ku e minister kende a splika ku e tin un persona den su gabinete ku ta duna konseho na eks studiantenan i atendé e tipo di problemanan aki. Tambe ta yuda yena formularionan relashoná ku e “draagkrachtmeting”.

Den kombersashon ku e grupo di eks studiante nan ta indiká ku nan ta na altura di e trabou ku e fundashon a hasi. Segun e eks studiantenan, ta trata di e sistema di kobransa ku DUO (Dienst Uitvoering Onderwijs) ta implementá. DUO ta uza e sistema di “draagkrachtmeting” pa re-kalkula i baha e montante ku e eks studiante  tin ku paga, despues ku esaki hasi su petishon ora e no por paga e montante original ku DUO a stipulá. E  problema ta ku aktualmente DUO no ta teniendo konsiderashon òf mihó bisá nan no ta implementando e “draagkrachtmeting” mas, ku konsekuensia ku e montante ku nan ta kobra ta práktikamente impagabel. Ta trata di montantenan di entre 500 pa 1000 EURO pa luna ku ta suma entre 1000 pa 2000 florin pa luna.

 Ta bini aserka ku ora DUO hasi su kobransa e no ta tene kuenta ku e gastunan mensual manera hipotek i fiansanan. Pues no ta duna e eks studiante masha espasio pa por paga e suma imponé. Esaki ta pone ku ni maske e eks studiante ke paga e debe e por hañ’é asta fásil den man di deurwaarder ku ta pone beslag riba su salario/propiedat ke la lucha duru pa atkerí i ku ta hink’é den un situashon bastante difísil pe sobrebibí i mantené su famia huntu. 

E eks studiantenan ta hasi un apelashon dramátiko pa yudansa real. Yena “draagkrachtmeting” so no ta yuda e kousa. DUO no ta tene kuenta ku esei i no ta tene kuenta ku situashonnan hopi diferente na Kòrsou. Aki tur hende mester tin outo pa bai trabou, atendé ku muchanan etc debí ku transporte públiko no ta konfiabel. Asina tin mas situashonnan ku na Kòrsou ta diferente.