WILLEMSTAD.- Korte di promé instansia a bai di akuerdo pa posponé kaso di labamentu di plaka poko pekuliar.
Pa ku esaki Ministerio Públiko ta akusá dos persona femenino.
Ta trata di C.R.(27) nasé na Merka i J.F. (35) nasé na Kòrsou.
J.F. ta keda akusá di a laba 86.250 florin dor di kumpra un tereno, durante e periodo di 21 ougùstùs 2014 te ku 2 di yüni 2020.
Segun e akusashon J.F. tabata traha na Warda Kosta i na yüni 2020 a drenta un tep anónimo na polis ku e tabata duna informashon na personanan ku ta “deal” den droga kontra pago.
Segun e informante, a base di esaki e trahadó di Warda Kosta tin un kuenta bankario ku hopi sèn riba dje. Ora polis a hasi un investigashon, a resultá ku e akusado a kumpra un tereno na balor di 87 mil florin na aña 2014.
Na promé instante e no por a splika kon el a kumpra e tereno. El a duna vários deklarashon entre otro ku e tereno no ta di dje i no ta e a kumpr’é, despues el a bisa ku ta e mes a kumpr’é i a paga tur kos. Pero polisnan ku a hasi mas investigashon a tuma nota ku ta otro hende tabata paga pa e tereno na notario.
Ta durante tratamentu di e kaso J.F. a bisa ku ta un eks a kumpra e tereno pe, pero el a fayesé algun tempu pasá. El a splika ku e persona tabatin negoshinan legal i a hasi fiansa pa kumpra e tereno.
Durante investigashon mas aleu, polisnan a saka afó ku C.R. tabata un di esnan ku tabata pasa sèn riba e kuenta di notario pa e tereno.
Mirando esaki, Ministerio Públiko ta akusá C.R. di a ‘stort’ sèn na notario pa e tereno na vários okashon.
Dia 14 sèptèmber 2014 el a ‘stort’ NAF 4900,- na MCB- Saliña, NAF 5000,- na MCB Lio Caprilles, 5000,- florin na MCB- Rio Canario .
Dia 15 sèptèmber 2014 NAF 4900,- na MCB Lio Caprilles i NAF 5000,- na MCB Saliña. Ministerio Públiko ta akus’é di tabata kómplise sabiendo ku e plaka ta bin di sírkulo kriminal.
C.R. a keda para riba ku e no sa di nada i a bisa ku a hasi mal uso di su pasport pa ‘stort’ e sèn riba kuenta di e notario pa ku e tereno.
Hues a bisa tin algun kos ku no ta muchu kla i no ta kuadra den e kaso aki.
Abogado Vaders ku ta hiba e defensa pa J.F. a pidi pa posponé e kaso, pa hasi mas investigashon. El a hasi petishon pa buska nòmber di esun ku realmente a kumpra e tereno pa su kliente.
Hues a pidi Ministerio Públiko pa hasi investigashon pa sa si en bèrdat e persona ku J.F. a bisa, a kumpra tereno pe.
Tambe pa buska informashon si e shon a muri i tambe pa wak kon lo a usa pasport di e otro akusado pa ‘stort’ e sèn. Mirando tur esakinan a hues posponé e kaso pa un tempu indefiní.