WILLEMSTAD- Gobièrnu di Kòrsou den diálogo ku tur ‘stakeholder’ di enseñansa a yega na palabrashon konkreto pa ku Èksamen Sentral pa  Enseñansa Sekundario/Avansá pa e aña eskolar 2020/2021. Manera ta konosí e impakto di e pandemia COVID-19 ta grandi riba e sektor di enseñansa. Pa por sigui traha di un forma koherente i ku ta garantisá e kalidat di Enseñansa pa nos alumnonan e aña eskolar akí, algun medida ta keda introdusí.

E medidanan a keda palabrá i introdusí pa henter e sektor di enseñansa. Pues e medidanan akí ta konta pa skol supsidiá i skol no-supsidiá dor di Gobièrnu. E informashon pa ku e medidanan akí ta keda aplikabel pa tur alumno ku tin ku pasa èksamen den VSBO, HAVO i VWO e aña akí. E Organisashonnan responsabel di parti di Gobièrnu ta Sektor di Enseñansa i Siensia (UOW), Inspekshon di Enseñansa (OI) i Sentro di Ekspertisia pa Prueba & Èksamen (ETE).

Sektor di Enseñansa i Siensia komo organisahon responsabel na nòmber di Ministerio di Enseñansa, Siensia, Kultura i Deporte huntu ku Direktivanan di Skolnan, ta informá henter e komunidat eskolar di e medidanan. Tur alumno ta haña informashon di e proseso via di e direktiva di skol di e alumno.

Resúmen di e medidanan:

#

Nivel

Medida

1
VSBO
Èksamen Sentral por Eskrito pa PBL, PKL i TKL ta keda limitá ku algun materia núkleo só. Pues lo no tin Èksamen Sentral den tur materia.


2
Èksamen Sentral di Práktika pa PBL i PKL ta kontinuá.


3
Periodo di Èksamen Sentral di Práktika ta kuminsá mas lat i tin mas tempu pa esaki, esta di 12 di aprel te ku 7 di mei 2021.


4

Ta introdusí un posibilidat èkstra pa repaso (Herkansing) den un materia pa Èksamen Eskolar.


5
VSBO/HAVO/VWO
Èksamen Eskolar ta keda kana konforme PTA (Programma van Toetsing en Afsluiting) di e skol. Tur kambio den PTA mester tin aprobashon di Inspekshon di Enseñansa.


6
HAVO/VWO
Ta introdusí un posibilidat èkstra pa repaso (Herkansing) pa Èksamen Sentral por Eskrito (dos materia na lugá di unu).


7
E di dos periodo (tijdvak) di Èksamen Sentral ta keda ampliá di 4 dia pa 10 dia.


8
Sektor di Enseñansa i Siensia, ETE i Inspeskhon di Enseñansa ta komuniká e planifikashon adaptá i demas detaye pa loke ta trata ehekushon di e medidanan na skolnan pa medio di e ‘Examenblad-VO’ i ‘Examenboek’.


9
Tur kambio di e reglanan konforme e ordenansa Èksamen final VWO, HAVO, VSBO ta keda reglá den un ordenansa ministerial konforme artíkulo 32 di e ordenansa di Enseñansa avansá (P.B. 1979 No. 29).