WILLEMSTAD.- Den yüni di e aña aki asosiashon Levende Talen Papiaments a kondusí un investigashon tokante di e éksito estudiantil di studiantenan di Aruba, Boneiru i Kòrsou. Meta di e investigashon tabata pa saka afó kiko ta e desafionan ku e studiantenan ta topa na momentu ku nan ta un studiante na Hulanda. Ku e informashon di e investigashon Levende Talen Papiaments lo bai desaroyá programanan pa yuda e studiantenan i tambe lo bai tene kombersashonnan ku esnan ku ta traha maneho i institutonan edukashonal.

Base di e investigashon

Tur aña hopi studiante di e islanan Karibense ta bin e parti Europeo di Reino pa sigui nan estudio HBO òf WO. Inskripshon, kontinuashon i éksito di studiantenan for di e islanan Karibense ta indiká ku tin un problema di konekshon. E porsentahe ku ta terminá nan estudio ku éksito ta abou. Institutonan edukashonal i organisashonnan di studiante tin hopi aña ta traha duru pa evitá ku e studiantenan aki ta stòp ku nan estudio. Monitor Beleidsmaatregelen hoger onderwijs 2018-2019 ta indiká ku éksito di studiantenan di islanan Karibense tin hopi aña stanká, apesar ku tin hopi kurso, programa i proyekto pa e studiantenan aki.

Un di e preguntanan ku a keda tratá den e investigashon ta dikon e diferente programanan no ta hiba na mehoransa di e situashon di e studiantenan. E investigashon a konsistí di diferente enkuentro online ku entre otro konsehero di estudio di diferente institutonan pa enseñansa avansá na Hulanda, dosentenan, investigadónan i un grupo grandi di studiante. E partisipantenan por a ekspresá nan mes liber na papiamentu òf hulandes. Ku e investigashon Levende Talen Papiamentu a identifiká faktornan ku por stroba òf stimulá e éksito di studiantenan di islanan ABC. Tambe Levende Talen Papiaments a identifiká faktornan ku mester tene kuenta kuné na momentu ku ta bai diseñá un programa pa solushoná e problemanan di konekshon i kambio i abandono di estudio. E investigashon a keda kondusí pa un studiante Rubiano, Elisha Geerman (Universidat di Utrecht) bou di guia di Nihayra Leona (presidente di Levende Talen Papiaments i promové na Universidat di Amsterdam)

Riba 17 di novèmber próksimo Levende Talen Papiaments lo presentá e resultadonan preliminar di e investigashon aki na Haagse Hogeschool. Aparte di presentá e resultadonan di e investigashon tambe lo hiba un entrevista ku un representante di Ministerio di Enseñansa, Kultura i Siensia i Ombudsman na Hulanda.

Esaki komo ku tur tres organisashon a kondusí un investigashon similar den e mesun periodo. Na e presentashon lo trese e tres investigashonnan huntu. Lo bai tin un ‘livestream’ di e presentashon pa interesadonan na Kòrsou, Aruba, Boneiru i Hulanda. E presentashon ta tuma lugá 15:00 na Hulanda i 10:00 na e islanan. Pa inskribí pa sigui e livestream, bishitá https://papiaments.levendetalen.nl/.

Levende Talen Papiaments

Levende Talen ta empeñá pa stimulá i desaroyá estudio di idioma na Hulanda. E sekshon Papiamentu ta dirigí riba promoshon di uso di Papiamentu den enseñansa i den e komunidat hulandes. Tambe e asosiashon ta dirigí riba stimulashon di éksito estudiantil di alumno- i studiantenan den Reino Hulandes ku tin Papiamentu komo lenga materno.