WILLEMSTAD.-E konferensia “Curaçao Data Days, ku a tuma lugá di 20 pa 22 di òktober 2021, a resultá un éksito kompletu. Tabata un evento virtual ku riba inisiativa di Ministerio di Desaroyo Ekonómiko a inisiá den estrecho koperashon ku diferente kompania di interes progresista riba tereno di teknologia i data. Curaçao Data Driven, Bureau Telecommunicatie en Post en Curaçao Tech Meetups, Smart Nation Curaçao Platform i Gemeente Amsterdam a brasa e proyekto i asina kolektivamente a tuma un inisiativa na interes di komunidat bou di kua kompanianan, gobièrnu i siudadanonan di tur gremio di poblashon. E meta prinsipal di e konferensia tabata pa krea sufisiente konsientisashon tokante di e bentahanan i e urgensia di “Data-driven and Informe Decision-Making”. Esaki finalmente lo mester kondusí na un mihó kalidat di bida pa komunidat, un komunidat ku un klima empresarial mas progresivo pa invershonista i pa logra un ekonomia mas sólido.

Un bista retrospektivo riba e organisashon di e evento, mirando e kalidat di orador, kantidat di bishitante i e interes di e organisashonnan partisipante nobo pa futuro, por konkluí ku e konferensia tabata eksitoso den su mishon i ku tin sufisiente ánimo i base pa kontinuashon na 2022. E konferensia a demostrá un bon balansa entre e parti práktiko, tékniko dirigí riba empresa, inspirativo, edukativo, ampliamente orientá pero tambe spesífiko, lokal i internashonal. Algun ehèmpel tabata entre otro e seshon di sr. Pito Salas (USA), desaroyadó di Pivot Table, oriundo di Kòrsou ku a trata un manera interaktivo pa por prosesá data lihé i eligí. E seshon di BPD-UNDP (Singapore) tokante di stabilidat digital di Karibe a duna hopi kuminda pa pensamentu. Banda di dje e kompanianan internashonal Microsoft i Facebook tambe tabata parti di e programa i a duna partisipantenan oportunidat pa kombersá ku e oradornan individualmente den e sala virtual.

E plataforma a keda bishitá 2698 biaha pa 276 bishitante úniko ku a subi riba e plataforma. Ku 502 bishita na e profil entre bishitantenan mes i 422 informashon despachá bou di nan mes. E nivel di interakshon tabata optimal, asta mas di loke a spera, pa un evento di tal índole ku e tópiko aki. E seshonnan ta disponibel pa 30 dia riba e plataforma: https://events.hubilo.com/curaao-data-days-2021-conference-program/sessions.

E organisashon di Curaçao Data Days durante di e konferensia ya a risibí diferente petishon pa partisipashon nobo di ekspertonan di organisashonnan lokal i internashonal ku ta masha entusiasmá. Tin ku hasta a hasi palabrashonnan konkreto pa partisipá na un siguiente edishon. Esaki ta sumamente motivante i ta reforsá e predisposishon positivamente. Un fecha spesífiko pa kontinuashon di e konferensia no ta konosí ainda, pero pa aña 2022 en todo kaso tin un konferensia pa un Curaçao Data Days nobo planiá. Despues lo duna mas informashon tokante di esaki.