WILLEMSTAD.- Ayera nochi kasi 12’or a surgi un eksploshon riba tereno di Refineria Isla di kual e informashonnan kompleto no a logra yega mesa di redakshon di EXTRA promé ku nos a bai imprenta.

E situashon tabata unu di basta pániko, ku kandela hopi grandi ta bai laira. E tabata parse den serkania di Cat Cracker i despues a resultá ku ta einan mes e kandela tabata.

Segun e informashonnan ku a keda konfirmá pa bosero di refineria sr. Henny Cornelia, e eksploshon a surgi den e Flare di Cat Cracker.

E kandela tabata den e área di gasolin. Djis despues ku e kandela a surgi a logra dominá e parti abou pero tabata luchando te den lat ku e parti mas ariba, na mas òf ménos 2 meter bou di e flam.

Sr. Cornelia a konfirmá pa EXTRA ku no tin niun hende heridá pero mas detaye e no por a duna. Pa awe mainta lo bai inspekshoná i nos lo por haña mas informashon di Refineria Isla

Remarkabel ta ku netamente djamars anochi Refineria Isla a kuminsá ku start bèk di e Cat Cracker. Tur kos tabata kanando bon te ku ayera nochi ora e eksploshon a surgi.