WILLEMSTAD - Awe mainta, na Guardian Group Fatum na Cas Coraweg #2, entre 10:00 - 11:00 tabatin un zonido duru paresido na un eksploshon. Esaki a kondusí na inmediatamente ehekutá plan di evakuashon di tur hende den í rondó di edifisio pa un área seif. No tabatin daño personal ni herdido.

E problema mes: un eksploshon den e parti ‘hoogspanning’ na e parti sentral di koriente na edifisio di Guardian Group Fatum un piso bou di suela, pues -1. Personal den e departamentonan a aktua rápidamente tantu den dominá e situashon di emergensia komo ehekutá e plannan di evakuashon. Ta investigando ta kiko presis a kondusí na e eksploshon aki.

Bosero di Guardian Group Fatum, Curd Evertsz a indika ku nan ta bèk den operashon normal di tur dia. No tin peliger, pues klientenan i públiko en general ku pa un of otro motibu mester akudí na Guardian Group Fatum por pasa normal. Ku otro palabra: Guardian Group Fatum ta habrí normal atrobe.