Arte ta habri un mundu nobo pa mucha i hóben

WILLEMSTAD.- Ayera a marka apertura ofisial di e eksposishon di arte “Little Masters of Arts”, ku un seremonia bunita di kòrtamentu di sinta na Luna Blou. E evento ta pone den lus e talento, imaginashon i kreatividat di un grupo di mucha ku a haña e oportunidat pa mustra nan obranan di arte.

E eksposishon ta reuní diferente obra, entre otro pintura di naturalesa, mata, flor, bestia, paisahe i portrèt. Kada pintura ta reflehá e manera úniko ku e artista hóben ta mira i interpretá e mundu rondó di dje. E kombinashon di koló, forma i tema ta mustra ku kreatividat no tin límite di edat.

E muchanan a partisipá den seshonnan di arte durante vários siman, riba djasabra, bou di guia di e maestra di arte Morgaine Parris. Durante e proseso aki, nan a haña espasio pa eksperi­mentá ku diferente téknika, desaroyá nan abilidat i, mas importante ainda, konfia den nan mes i den nan propio kreatividat.

Arte tin un balor grandi den desaroyo di mucha. Banda di stimulá imaginashon i kapasidat pa pensa di forma kreativo, pintura por yuda mucha ekspresá nan sintimentu, desaroyá pasenshi, konsentrashon i motórika fini.

Un eksposishon manera esaki ta bai mas leu ku solamente mustra pintura. E ta duna mucha e oportunidat pa sinti orguyo di nan trabou, eksperensiá kon ta pa nan talento haña atenshon i kompartí algu personal ku otro hende. Pa famia i bishitante, ta un invitashon pa mira mas leu ku e pintura i rekonosé e esfuerso, e proseso i e potensial ku ta skonde tras di kada obra.

E eksposishon Little Masters of Arts lo ta habrí pa públiko te ku 25 di òktober, tur dia di 17:00 te 20:00 na Luna Blou. Públiko ta invitá pa bishitá e eksposishon, atmirá e obranan i duna e hóbennan artista e sosten ku nan meresé.