WILLEMSTAD.- Tin un èkstra rekargo di 2 sèn riba produktonan petrolero na kaminda. Segun informashon ku EXTRA ta disponé di dje t’asina ku den próksimo anunsio di preis di gasolin i demas produktonan di utilidat ta bai duna mas informashon riba esaki.

E èkstra rekargo aki ta temporal pero pa kuantu tempu e lo keda vigente no ta konosí ainda. E rekargo ta intenshoná pa yuda kubri gastunan èkstra di Curoil, segun EXTRA tin entendé.

E gastunan èkstra pa Curoil tin relashon ku importashon di produktonan petrolero i otro derivadonan manera gas i bitumen i e proseso pa baha e produktonan aki usando yèti, pipanan, pòmpnan i tankinan di almasenahe.

Gastunan ku den pasado tabata bai den e totalidat di operashon di e operadó di e refineria. Pero entretantu no tin un operadó mas pa refineria.

Refineria di Kòrsou mes tin e instalashonnan atrobe bou di su responsabilidat, pero un aktividat ku nan ta hasi ta di tene e instalashonnan kayente i paga e personal. Otro gastunan nan no por kubri i pa esei e intenshon pa e rekargo èkstra pa yuda Curoil den pago di esakinan.