WILLEMSTAD. - For di informashon verídiko, EXTRA a komprondé ku petishon pa ekstradishon di Sr. George Jamaloodin lo no bira un tratamentu fásil. E tratamentu aki tin su komplikashonnan kuné, pa motibu ku Jamaloodin tin un pèrmit di residensia Venezolano. Esaki ta hasi e proseso kompliká pa Venezuela koperá o sea entrega Jamaloodin na hustisia di Kurasoleño. Esaki ta loke ku Extra a komprondé for di un fuente digno di krédito.

Ayera a sali na kla ku tribunal di Venezuela a trata e petishon di Ministerio Públiko Kòrsou pa ekstradishon di Jamaloodin. E tribunal ayera no a tuma un desishon ainda, miéntras  no ta konosí tampoko ki dia por tin un desishon òf un  veredikto.

For di e mesun fuente ta indiká ku e pèrmit di residensia ku Jamaloodijn tin, ta hasi difísil pa ekstradishon.

Tin mas detaye ku por sierto ta stroba un ekstradishon “soepel”

Te ainda tin un konfushon si Jamaloodin ta realmente den sèl di polis será òf ta un sorto di “huisarrest”  e tin.

Manera ta konosí Jamaloodin ta keda sospechá di ta un di e outornan intelektual den kaso asesinato di Sr. Helmin Wiels i tambe ku e ta metí den otro investigashonnan ku tin di aber ku falsifikashon di dokumentu i froude.

.