WILLEMSTAD.- Ayera tratamentu di e  kaso di asesinato  ku a keda yamá “Fashion” a keda posponé den korte di apelashon.

Ta trata di e kaso di asesinato di kual e víktima  Genciël “ Genna” Recbel Joshua Feller, nasé na Hulanda (23), a keda likidá na altura di Libanesa Caracasbaaiweg, dia 2 di sèptèmber 2019.

E hòmbernan  Y.  “Jami” Frans(31), A. “Shabalo” Jakobus (23) i I.  “ Gabi” Alberto (29) a keda kondená na 20 aña kada un pa e asesinato.

Tur 3 a apelá nan sentensia pa motibu ku nan ta insistí di ta inosente.

Durante tratamentu di e kaso e testigu di fam P. ku ta pareha di Alberto a keda skuchá.  P. den prinsipio a koperá ku hustisia i bisa entre otro ku e hòmbernan a kont’é di e asesinato.

Asta el a mustra polis e T-shirt kolo kòrá i un pèchi  ku Alberto a usa e dia di asesinato. Ku ayudo di tur e deklarashonnan di P. polis a bisa di a logra solushoná e kaso.

Ayera durante su testimonio, P. a  bòltu su deklarashonnan na 360 grado. Bou di huramentashon el a deklará ku niun momento so e hòmbernan a kont’é di e asesinato.

El a bisa di a deklará asin’ei na polis pa motibu ku e tabata kier a bai su kas pa wak su yu ku tabata riba kaya. Segun e testigu el a  konta e polisnan loke nan kier a skucha pa lag’é bai. Segun P. e hòmbernan ta inosente i no tin nada di aber ku e asesinato.  Abogado general mr Angela no por a kere loke e tabata skucha di e testigu.

Esei a pone ku el a pidi e tribunal pa traha un prosèsverbal di e loke e testigu a deklará i a pidi tambe pa detené pa perhurio.

E testigu a bisa ku e ta desepshoná ku Ministerio Públiko pa motibu ku nan a traha un dil kuné i no a kumpli. Nan a bis’e ku nan lo mand’e Hulanda, dun’é kas, i buska un estudio pe, pero nada di esakinan a sosodé.

E tribunal di korte di apelashon despues di a lesa e deklarashonnan anterior di e testigu na polis, a bai kompletamente di akuerdo ku abogado general pa detené pa perhurio.

E tim di aresto ku a bini ku e akusadonan a detené e testigu bou di òrdu di e tribunal.

Hues Hubben a hasi e akusadonan vários pregunta di kual nan a opta pa hasi uso di nan derechi keda ketu. Hues dado momento a puntra nan kiko ta e motibu ku nan a apelá nan sentensia mirando ku nan no ta kontestando niun pregunta. Frans a bisa ku e hues di korte di promé instansia no a repasá bon dor di e dosié i no a tene kuenta ku vários punto.  P’esei e ta spera ku e tribunal di korte di apelashon si lo lesa tur kos den e dosié i husga e kaso mas mihó.

Mirando tur esakinan korte di apelashon a posponé e kaso pa hasi mas investigashon di loke e testigu a trese dilanti.

E kaso lo kontinuá dia 19 di ougùstùs binidero pro forma.