WILLEMSTAD.- Jeser El Ayoubi a entregá awe, djaluna 11 yanüari su retiro komo miembro di parlamento serka griffier. Esaki despues ku partido PAR a pidié pa e asiento.

Ku su retiro El Ayoubiu ta habri kaminda pa number 11 riba lista di PAR, Emmilou Capriles drenta parlamento, manera EXTRA a informá for di siman pasá. Resientemente un kambio di parlamentario pa partido MAN a tuma lugá manera mester ta, esta ku koperashon di koleganan parlamentario pa sera quorum a trata kredensial di Yves “Payo” Schoop ku a drenta na lugá di Elsa Rozendal.

Awor ku El Ayoubi a sali promé ku aprobá kredensial di Capriles mester wak si atrobe parlamento sa di tene su mes na desensia demokrátiko, forma quorum pa asina tur partido ku a gana representashon den parlamento durante elekshon na 2017 por nombra representantenan di pueblo den e órgano. Ultimo biaha ku PAR ke a nombra un representante nobo, esta Shaheen Elhage ku a drenta na lugá di William Millerson (q.e.p.d.) mester a bai korte pa a logra esaki.

El Ayoubi for di fin di òktober 2020 a indiká na partido PAR ku e no ta subi lista pa elekshon dia 19 mart awor. Den desèmber 2020 El Ayoubi a informá PAR ku e ta pone su asiento na disposishon di partido i na momento ku partido tin un otro kandidato pa okupá e puesto di parlamentario e lo biaha pa laga e kandidato nobo drenta.

E karta konfirmando esaki ta firmá alabes pa presidente di PAR, Gerold Rach garantisando un traspaso harmonioso i sin insertidumbre. Awor ku Capriles ta kla pa drenta, PAR a pidi El Ayoubi pues pa entregá su retiro loke el a hasi pues awe mainta.